БҰҰ Бас хатшысының баспасөз хатшысы Стефан Дюжаррик күнделікті баспасөз мәслихатында мәлімдеме жасады.

«Бас хатшы соңғы бірнеше күнде Иран мен АҚШ арасында жалғасып жатқан, әрі ауқымы кеңейген әскери текетіреске терең алаңдайды», — деген Дюжаррик дағдарыстың аймақтағы барлық елдерге әсер етіп, сауда жүйелеріне, гуманитарлық көмекке қол жеткізуге, тасымал шығындарына, сол сияқты аймақ елдері мен одан тыс жерлердегі отын және негізгі тұтыну тауарларының бағасына қысым түсіріп отырғанын атап өтті.

Дюжаррик: «Бас хатшы әсіресе Иранда құрылысы жүріп жатқан атом электр станциясы мен су тазарту нысаны сияқты азаматтық инфрақұрылымдарға, сондай-ақ аймақ бойынша Кувейт пен басқа да елдердегі электр станциялары мен су тазарту ғимараттарына жасалған шабуылдарға байланысты алаңдаушылық білдіреді», — деген сөздерді тілге тиек етті.

Гутерриштің «мұндай шабуылдардың қабылдануы мүмкін емес екенін және дереу тоқтатылуы тиістігін» айтқанын жеткізген Дюжаррик: «Бас хатшы бұл қақтығыстың әскери шешімі жоқтығын тағы да баса айтып, бейбіт әрі баянды шешім үшін дипломатиялық күш-жігерді арттыруға шақырады», — деді.

Баспасөз хатшысы Дюжаррик тараптар арасында қол жеткізілетін келісім Ормуз бұғазы мен оның төңірегіндегі халықаралық кеме қатынасы құқықтары мен бостандығын толықтай қайта орнына келтіруді қамтуы тиіс екенін атап өтті.