Тұтқындарды ақпараттандыру кеңсесінің мәліметінше, Газада ұсталған 11 палестиналық бірнеше айға созылған қамаудан кейін босатылды.

Мәлімдемеде тұтқындардың Газаның оңтүстігіндегі бір шекара өткелінде босатылғаны, алайда денсаулық жағдайына қатысты нақты мәлімет берілмегені айтылды. Сондай-ақ босатылғандардың медициналық тексеруден өту үшін Халықаралық Қызыл Крест комитеті арқылы Дейр әл-Балах қаласында орналасқан Әл-Ақса шейіттері ауруханасына жеткізілгені хабарланды.

Бұған дейін Израиль армиясы босатқан палестиналық тұтқындар ауыр зардап шегіп, дұрыс тамақтанбағандарын және ауыр жарақат белгілері болғанын жеткізген болатын. Мұның қамауда болған кезеңде көрген азаптаулардың салдары екенін айтқан.

Израиль 13 қазанда ХАМАС-пен жасалған атысты тоқтату және тұтқын алмасу келісімі аясында 2 мыңға жуық палестиналық тұтқынды босатқан. Олардың шамамен 1 700-і Газадан.  Сол кезде босатылғандардың көпшілігінің денсаулық жағдайы нашар болғаны байқалып, олардың біразы Израильдің қамау орталықтарында азаптауға, аштыққа ұшырағандарын айтқан.

Палестиналық және израильдік адам құқықтарын қорғау ұйымдарының дерегінше әлі күнге дейін 10 мыңнан астам палестиналық Израильде қамауда отыр. Араларында әйелдер мен балалар да бар. Құқық қорғаушылар тұтқындардың азаптау, аштық және медициналық көмектің көрсетілмеуімен бетпе-бет келіп отырғанын, мұндай жағдайдың көптеген тұтқынның өліміне әкелгенін атап өтті.