Еуропалық комиссия басшысы Урсула фон дер Ляйен Еуропа 28 ақпанда АҚШ пен Израильдің Иранға қарсы соғысы басталғалы бері Еуропаның мұнай мен газ импортына қосымша 32 миллиард доллар жұмсауға мәжбүр болғанын мәлімдеді.
Берлинде өткен баспасөз мәслихатында ол Еуропаның тағы бір күрделі энергия дағдарысына тап болып отырғанын айтып, Еуропа Одағы елдері бұдан сабақ алуы тиіс екенін жеткізді.
Ол: «2022 жылы Владимир Путин газ жеткізуді тоқтатты, енді мәселе Ормуз бұғазына келіп тірелді. Шетелден алынатын қазба отындарға шамадан тыс тәуелділік — біздің осал тұсымыз. Бұл тәуелділікті азайтуымыз керек», - деді.
Сондай-ақ Еуропа елдерін сенімді энергиямен қамтамасыз ету үшін жаңартылатын энергия көздерін кеңейтіп, шағын модульдік реакторлармен қатар ядролық технологияларды дамыту қажет екенін атап өтті.
«Еуропада өндірілген әрбір киловатт-сағат энергия экономикалық тұрақтылыққа, энергияның қолжетімді болуына және Еуропаның тәуелсіздігіне ықпал етеді», - деді Фон дер Ляйен.
Иранға қатысты санкциялар мәселесіне тоқталған ол: «Санкцияларды жеңілдетуге әлі ерте. Ол үшін Иранда түбегейлі өзгерістер болуы қажет», - деді.
