Мемлекеттік “SANA” ақпарат агенттігінің сейсенбі күні таратқан мәліметіне сәйкес, Сирия Қорғаныс министрлігі елдің оңтүстігінде орналасқан Сувейда аймағында жасалған жазалау әрекеттеріне байланысты кінәлілерді анықтау мақсатында арнайы тергеу комиссиясы құрылғанын хабарлады.

Бұл мәлімдеме әскери форма киген белгісіз тұлғалардың Сувейда қаласында адамдарды жазалап жатқанын көрсеткен бейнежазбалардың интернетте тарап, қоғамда үлкен резонанс тудырғанынан кейін жарияланды.

Министрлік өз мәлімдемесінде: «Сувейда аймағында әскери форма киген белгісіз топ жасаған бұл қорқынышты және аса ауыр заңбұзушылықтарға қатысты ақпараттар Қорғаныс министрі Мерхеф Әбу Касраның нұсқауымен мұқият зерттелуде», – деді.

Мәлімдемеде аталған әрекеттерге қатысы бар тұлғалардың байланыстары мен өткен әрекеттері зерттелетіні және кінәлілер анықталғаннан кейін ең ауыр жазалар берілетіні айтылды.

Министр Мерхеф Әбу Касра: «Бұл заңбұзушылықтарға қатысы бар адамдар Қорғаныс министрлігіне тиесілі болса да, ешбір жағдайда кешірім жасалмайды», – деді.

Қақтығыстар мен зорлық оқиғалары

Сирия Ішкі істер министрлігі де сейсенбі күні таңертең оқиғаға байланысты жедел тергеу басталғанын мәлімдеді.

Бұған дейін Сирия Президенті әкімшілігі де жауаптылардың шені қандай болса да, жауапқа тартылатынын ескерткен болатын.

Сувейдадағы алғашқы қақтығыстар 13 шілдеде бәдеуин араб тайпалары мен қаруланған дүрзі топтарының арасында басталып, артынша зорлық-зомбылық бүкіл аймаққа жайылды.

Көп ұзамай Израиль Сирияның әскери нысандарына, соның ішінде Дамаск маңындағы инфрақұрылымдарға әуе соққыларын жасады.

Израиль бұл шабуылдарды дүрзі қауымын қорғау мақсатымен жасағанын мәлімдеді. Алайда Сириядағы көптеген дүрзі көсемі шетелдік араласуға мүлде қарсы екенін айтып, біртұтас Сирия мемлекетін қолдайтынын білдірді.

Бірнеше күнге созылған қақтығыстардан кейін сенбі күні атысты тоқтату режимі жарияланды.