Ватиканның ең жоғары дипломатиялық өкілі, кардинал Пьетро Паролин АҚШ президенті Дональд Трамптың «Бейбітшілік кеңесі» бастамасына қосылмайтындарын мәлімдеді. Сонымен қатар Паролин дағдарыстық жағдайларды басқару Біріккен Ұлттар Ұйымына жүктелуі тиіс екенін айтты.
Паролин сейсенбі күнгі мәлімдемесінде Қасиетті Тақ «басқа мемлекеттердің сипатына сай келмейтін өзіндік ерекше табиғатына байланысты Бейбітшілік кеңесіне қатыспайтынын» жеткізді.
“Бізді алаңдататын мәселе, — деді Паролин, — халықаралық деңгейдегі мұндай дағдарыстық жағдайларды ең алдымен Біріккен Ұлттар Ұйымы басқаруы тиіс екендігі.”
Қаңтар айында АҚШ тарихындағы тұңғыш папа және Трамптың кейбір саясаттарын сынаушы Папа Леоға кеңеске қатысу туралы шақыру жіберілген болатын.
Трамптың қазан айындағы атысты тоқтатуға негіз болған Газа жоспары аясында бұл кеңес Газаның уақытша басқаруын қадағалау үшін құрылған. Трамп кейінірек бұл кеңесті өзі төрағалық ететіндей етіп, жаһандық қақтығыстармен айналысатын деңгейге дейін кеңейтетінін айтқан еді. Кеңес Газаны қайта қалпына келтіру мәселелерін талқылау үшін бейсенбі күні Вашингтонда алғашқы отырысын өткізеді.
Бейбітшілік кеңесі Еуропа, Таяу Шығыс, Шығыс Азия және Латын Америкасындағы АҚШ-тың жақын одақтастарынан тұрады. Италия мен Еуропалық Одақ кеңеске мүше болмағандықтан, өз өкілдерін бақылаушы ретінде жіберуді жоспарлап отырғандарын мәлімдеді.
Мексика толық мүшеліктен бас тартты
Осы арада Мексика президенті Клаудия Шейнбаум сейсенбі күні мәлімдеме жасап, Бейбітшілік кеңесінде Палестина өкілдерінің болмауына байланысты Газадағы атысты тоқтату жоспарын қадағалайтын АҚШ бастаған бұл топқа толық мүше ретінде қатыспайтынын айтты.
Баспасөз мәслихатында ол «Біз Палестинаны мемлекет ретінде танитындықтан, Израильдің де, Палестинаның де қатысуы маңызды. Кеңес бұлай ұйымдастырылмаған», — деді.
Шейнбаум Біріккен Ұлттар Ұйымындағы елшісін бақылаушы ретінде жіберетінін жеткізді.
«Бізді бақылаушы ретінде қатысуға шақырды, егер мүше болмасақ, бақылаушы ретінде қатысуымызды сұрады. Сыртқы істер министрімен бірге БҰҰ-дағы елшіміздің бақылаушы ретінде қатысуы туралы шешім қабылдадық», — деп қосты ол.
Шейнбаум Израильдің Газаға және Палестина халқына бағытталған жалғасып жатқан шабуылдарын «геноцид» деп атап, Палестинаны қолдайтынын және «екі мемлекетті шешімге» шақыратынын білдірді.
