Сирия үкіметінің хабарлауынша, Түркия президенті Режеп Тайып Ердоған Сирия президенті Ахмед Шарамен телефон арқылы сөйлесіп, Сириядағы ахуал мен тұрақтылықты күшейтудің жолдарын талқылаған.
Ресми мәлімдемеде телефон әңгімесінде Сириядағы соңғы жағдай және елде тұрақтылық орнату үшін атқарылып жатқан шаралар жан-жақты талқыланғаны айтылды.
Мәлімдемеге сәйкес, президент Шара Сирияның ұлттық негіз қалаушы қағидаттарын тағы бір мәрте тоқталып, елдің барлық аумағында мемлекеттің толық егемендігін қайта қалпына келтірудің маңыздылығын ерекше атап өтті.
Сондай-ақ Шараның басымдықтары бейбіт тұрғындарды қорғау, Алеппо маңындағы қауіпсіздікті қамтамасыз ету және қайта қалпына келтіру үдерісіне кедергі келтіріп отырған заңсыз қарулы әрекеттерді тоқтату екені айтылды.
Сирия үкіметінің мәліметінше, Президент Ердоған қауіпсіздік пен тұрақтылықты нығайтуға бағытталған барлық күш-жігерді қолдайтынын жеткізген.
Алеппода қақтығыстардың күшеюі
Телефон әңгімесі Алепподағы қауіпсіздік жағдайлары күшейген кезде болды. Сирия билігі көптеген PKK/YPG лаңкесінің даулы аудандардан қашып кеткенін мәлімдеді.
Ресми тұлғалардың айтуынша, Шейх Максуд пен Әшрафия аудандарындағы шиеленіс соңғы жылдардағы ең ірі қоныс аудару толқындарының бірін туындатқан. Төтенше жағдай жоспары аясында шамамен 142 мың бейбіт тұрғын эвакуацияланған.
Билік Алеппоның өзінде және маңайында уақытша баспаналар ашылғанын хабарлады. Сондай-ақ аталған ұйымды тұрғын аудандар мен гуманитарлық дәліздерді артиллериялық атқылауға ұшыратты деп айыптады.
Сирия билігінің мәлімдеуінше, Ішкі қауіпсіздік күштері зардап шеккен аумақтарды бақылауға алып, қоныс аударған тұрғындардың қайта оралуын қамтамасыз етуге дайындық жүргізіп жатыр.
Бұл қақтығыстар Сирия демократиялық күштерін мемлекеттік институттарға интеграциялау жөнінде бұған дейін жасалған келісімге қарамастан болды. Дамаск билігі аталған келісімнің әлі іске асырылмағанын атап өтті.
