Германия Ішкі істер министрлігі сейсенбі күні билік өкілдерінің экстремистік топқа қарсы ауқымды рейдтер өткізгенін және өзін "Германия Корольдігі" деп атайтын топтың таратылғанын хабарлады.

Федералдық прокуратура да үш құрылтайшысы бар төрт адамның рейд барысында тұтқындалғанын мәлімдеді.

Министрлік тарапынан “қауіпті экстремистер” деп сипатталған "Германия Корольдігі" — қазіргі Германия Республикасының заңдылығын мойындамайтын "Рейх азаматтары" деп аталатын неміс астыртын қозғалысының бір бөлігі.

Бұл топтың мүшелері Бірінші дүниежүзілік соғыстың алдындағы Герман империясы әлі де өмір сүріп жатыр деп сенеді.

Министрлік либерал-демократиялық құрылымға шабуыл жасады деп айыпталған топтың таратылғанын ресми түрде жариялады.

Шамамен 6000 жақтаушысы бар делінген топқа қарсы рейдтер елдің жеті аймағында жүргізілді.

Билік өкілдері бұл топтың "Германия Федеративтік Республикасының бар екендігін жоққа шығаратынын және оның құқықтық жүйесін мойындамайтынын" мәлімдеді.

Министрлік аталған топты тарату себебін "мақсаты мен қызметінің қылмыстық заңнамаға қайшы келуі және конституциялық құрылымға қарсы бағытталуы" деп түсіндірді.

Билік соңғы 10 жыл ішінде бұл топтың "жалған мемлекеттік құрылымдар мен мекемелер" құрғанын, олардың ішінде өз валютасы, жеке куәліктері мен сақтандыру жүйесі де болғанын атап өтті.