Түркия президенті Режеп Тайып Ердоған Мысырмен ынтымақтастықтың өңірлік тұрақтылыққа ықпал ететінін және Анкараның бұл мүмкіндікті инвестиция мен сауда саласында тиімді пайдаланғысы келетінін айтты.
Ердоған Каирде өткен Түркия–Мысыр Іскерлік форумының жабылуында «15 миллиард долларлық екіжақты сауда көлеміне жету жолында Мысыр президенті Әбделфаттах әс-Сисимен жұмысымызды жалғастырамыз», - деді.
Түркия президенті Жоғары деңгейдегі стратегиялық ынтымақтастық кеңесінің отырысында сауда және экономикалық қатынастардың жан-жақты талқыланғанын атап өтіп, қарым-қатынастың негізін нығайтатын және барлық саладағы ауқымын кеңейтетін келісімдерге қол қойылғанын жеткізді.
«Жаһандық экономикада бір жағынан протекционизм мен ішкі саясат күшейіп жатқан кезде, бір жағынан әл-ауқатты сақтап қалу үшін ынтымақтастықтың маңызы артып отырғаны байқалады. Барған сайын күрделенген заманда қолдауыңызбен, экономикамызды бірлесе күшейтіп, бірге өркендететінімізге шын жүректен сенемін», - деді Ердоған.
Ердоған Мысырдың 8 миллиард доллардан асатын сауда көлемімен Түркияның Африкадағы ең ірі сауда серіктесі екенін атап өтіп, «Мысырдың ең көп экспорт жасайтын елдері арасында біз 7,4 пайыздық үлеспен үшінші орындамыз, ал ең көп импорт жасайтын елдер қатарында 3,4 пайыздық үлеспен жетінші орында тұрмыз», - деді.
Ердоған Сауда министрлерінің келесі отырысы Анкарада өтетінін мәлімдеді.
Президент: «Еркін сауда туралы келісімімізді ауыл шаруашылығы өнімдерін де қамтитындай етіп жаңарту үшін жұмысты жалғастырып жатырмыз. Биыл Анкарада өткізуді жоспарлап отырған 6-шы Бірлескен комитет отырысында да осы бағытта маңызды ілгерілеуге қол жеткізуді көздейміз», - деді.
Ердоған Түркияның Мысырдағы әртүрлі саладағы шамамен 4 миллиард долларлық инвестициялары қазіргі уақытта 100 000 мысырлықты жұмыспен қамтып отырғанын да айтты.
Президент түрік компанияларының экспорттық әлеуеті жоғары салалардың көшбасшылары екенін атап өтіп, түрік мердігерлері Мысырда жалпы құны 1 миллиард доллардан асатын 27 жобаны жүзеге асырып жатқанын мәлімдеді.
Сондай-ақ Ердоған Мысырдың «2030 көзқарасы» аясында жоспарланған 14 жаңа «ақылды қала» құрылысына түрік компанияларының да қатысатынына үміт білдіріп, түрік компанияларына деген сенімі мен қолдауы үшін Сисиге алғыс айтты.
Президент Түркияның құрылыс саласындағы технологиясы мен стандарттарын Мысырдың жұмыс күші мен тәжірибесімен ұштастыру Африка мен Азия бойынша ірі ауқымды жобаларды табысты жүзеге асыруға мүмкіндік беретінін де ерекше атап өтті.
