АҚШ Израильге Иранға қарсы жүргізіліп жатқан соғыстың болжанғаннан ұзаққа созылатынын хабарлады. Ормуз бұғазын қайта ашуға бағытталған операциялар тағы бірнеше аптаға жалғасуы мүмкін.
Израильдің «Channel 12» телеарнасы жексенбі күні таратқан мәліметке сәйкес, Вашингтонның мақсаты тек су жолын қайта ашу емес, АҚШ сондай-ақ Иранның жаһандық энергия бағасына кең ауқымды ықпалын да жоюды көздейді.
Бұл үшін уақыт қажет болса да, АҚШ шенеуніктерінің стратегиялық өзгерістерге қол жеткізуді қалайтыны айтылды.
АҚШ президенті Дональд Трамп бастапқыда әскери операцияның төрт-бес аптаға созылатынын мәлімдеп, операциялардың жоспардан ілгері екенін бірнеше рет атап өткен еді.
Израиль армиясының ресми өкілі Эфи Дефрин жексенбі күні жасаған мәлімдемесінде Иранға және Ливандағы Хезболла тобына қарсы шабуылдардың бірнеше аптаға жалғасатынын айтты.
АҚШ-та орналасқан «Axios» ақпараттық сайты Вашингтондағы және одақтас елдердің шенеуніктері қақтығыс қарқыны бәсеңдеген күннің өзінде, АҚШ-тың бұл үдеріске қатысуы қыркүйек айына дейін созылуына дайындалып жатқанын хабарлады.
АҚШ пен Израильдің Иранға қарсы шабуылдары 28 ақпанда басталды. Сол уақыттан бері кемінде 1300 адам қаза тапты. Олардың арасында Иранның бұрынғы рухани көсемі Әли Хаменей де бар.
Иран бұл шабуылдарға жауап ретінде Израиль, Иордания, Ирак және АҚШ-тың әскери күштері орналасқан Парсы шығанағы елдеріне ұшқышсыз ұшу аппараттары және зымырандармен шабуыл жасады.
