Ирактың Сүлеймание аймағында PKK лаңкестік ұйымының мүшелері қаруларын тастай бастады. Бұл оқиға Анкараның террорсыз Түркия құруға бағытталған күш-жігеріне сәйкес маңызды қадам болып табылады.

Түрік қауіпсіздік күштерінің лаңкестікке қарсы ұзақ мерзімді операцияларынан кейін PKK мамыр айында таратылып, қаруларын тастайтынын жариялады. Бұл елдің терроризмге қарсы күресіндегі үлкен жетістік ретінде аталды.

Сонымен қатар Түрік мемлекеті лаңкестікке қарсы күресін дипломатиялық алаңда да жүргізді.

Еуропа мен Таяу Шығыстағы халықаралық серіктестерге ұзақ уақыт бойы тұрақты қысым көрсету өз нәтижесін берді. PKK-ның шетел астаналарында еркін әрекет етуі, қаржы жинауы және түрлі саяси жамылғылар арқылы қор қалыптастыруы айтарлықтай азайды. Түркияның геосаяси ықпалының артуы мәселелерді жаһандық державалардың елеп назарға алуына ықпал етті.

Экономикалық байланыстар, энергетикалық дипломатия және аймақтық серіктестіктер арқылы Анкара PKK-ның шетелдегі қолдау желілерін біртіндеп әлсіретті.

Әділет және даму партиясының (АК партия) өкілі Өмер Челик қару тапсыру процесі бірнеше ай ішінде аяқталуы тиіс екенін айтқан болатын.

“NTV” телеарнасына берген сұқбатында Өмер Челик қару тапсыру процесін бақылау үшін Түрік барлау қызметі мен Қарулы Күштерінің өкілдерінен тұратын тексеру тобы құрылатынын білдірді.

“Ирактағы қару тапсыру процесі үш-бес ай ішінде аяқталуы керек... Егер бұл мерзімнен асып кетсе, арандатушылықтарға жол ашылады,” - деді Челик.

Түркия 40 жылдан астам уақыт бойы PKK-мен күресіп келеді. Бұл террористік ұйым бейбіт тұрғындар мен Түрік Қауіпсіздік күштеріне шабуыл жасап, 40 мыңнан астам адамды өлтірді.