Түркия мен Канада еркін сауда туралы келісімге қатысты келіссөздерді бастауға уағдаласты.
Екі елдің Сауда министрліктері сейсенбі күні жариялаған бірлескен мәлімдемеде Өмер Болат пен Маниндер Сидхудың Түркия мен Канада арасындағы нығайып келе жатқан экономикалық әріптестікті одан әрі дамыту мақсатында басқосқаны айтылды.
Түркия тарапының мәлімдемесінде: «Президентіміз Режеп Тайып Ердоған мен премьер-министр Марк Карни арасында жуырда өткен телефон әңгімесінен кейін ұйымдастырылған бұл кездесуде министрлер Түркия мен Канада арасындағы сауда және инвестициялық байланыстарды одан әрі нығайтуға ниетті екендерін растады», – делінген.
Мәлімдемеде бұл қадам екі елдің сауда әріптестігінің әлеуетін толық пайдалануға деген ниетін көрсететіні атап өтілді.
Мәлімдемеге сәйкес, министрлер екі ел арасындағы байланысты нығайтып, жолаушыларға, кәсіпкерлерге және экспорттаушыларға жаңа мүмкіндіктер беретін Әуе қатынасы туралы келісімнің кеңейтілуін құптады.
Тараптардың пікірінше, әуе қатынасының кеңеюі сауда байланыстарының нығаюына ықпал етіп, екі ел экономикасын жақындата түседі.
