Мемлекеттік БАҚ- тың хабарлуынша, іздестіру-құтқару топтары өткен демалыс күндері Цзянси провинциясында нөсер жауын салдарынан болған көшкіндерден кейін тағы бір адамның мәйітін тапты. Осылайша қаза тапқандар саны 16-ға жетті.
Адам шығыны «Саудел» тайфуны Қытайдың шығыс жағалауына жеткеннен кейін бірнеше күн бойы толассыз жауын жауған Суйчуань ауданындағы үш елді мекенде тіркелді.
Қытайдың мемлекеттік “CCTV” телеарнасы интернетте жариялаған хабарында Гаопин елді мекенінде болған лай көшкінінен 13 адамның қаза тапқанын мәлімдеді.
Цзоань елді мекенінде екі адамның, ал Танху елді мекенінде тағы бір адамның мәйіті табылды.
“Xinhua” ақпарат агенттігінің хабарлауынша, Суйчуань ауданында 18 мыңнан астам адам қауіпсіз жерге көшірілді.
Бұған дейін мемлекеттік БАҚ тайфун әкелген нөсер жауын салдарынан көршілес Хунань провинциясында да екі адамның қаза тапқанын хабарлаған еді.
“CCTV” хабарында адам шығынының нақты себебі көрсетілмегенімен, нөсер жауынның көшкіндер мен басқа да табиғи апаттарға әкелгені айтылды.
«Саудел» тайфуны 28 тамызда Чжэцзян провинциясының жағалауына екі рет, ал 3 қыркүйекте Фуцзянь провинциясының жағалауына шыққан болатын.
Цзянси мен Хунань провинциялары жағалауда орналасқан Чжэцзян және Фуцзянь провинцияларынан елдің ішкі бөлігіне қарай орналасқан.
