АҚШ президенті Дональд Трамп Парсы шығанағы елдеріне қарымта соққы болатынын білсе де, Иранға қарсы әрекетті жалғастыра беретіндерін айтты. Ол: «Мәселе «Білуіміз керек пе еді?» деген сұрақ емес. Мәселе біле тұра, істелуі тиіс жұмысты атқару», - деді.
Трамп бірнеше Парсы шығанағы елі Иранның шабуылына ұшырағанын айтып, Сауд Арабиясы, Кувейт және Бахрейннің соққы алғанын жеткізді. Сонымен қатар мұндай жағдайды алдын ала нақты болжаған сарапшылар болмағанын атап өтті.
Ол соғыстың бұл апта аяқталмайтынын, бірақ жақын арада бітетінін және ұзаққа созылмайтынын мәлімдеді. Трамп бұл қадамды өзі қаламаса да, міндет ретінде қабылдағанын жеткізді.
АҚШ президенті: «Егер Иранға қарсы соққы болмағанда, бұл жағдай ядролық соғысқа, тіпті Үшінші дүниежүзілік соғысқа ұласуы мүмкін еді», - деді.
Алайда билік өкілдерінің мәлімдемелері бір-біріне сәйкес келмейді. Трамп бастапқыда операция 4-5 аптаға созылады деген болатын. Ал Энергетика министрі Крис Райт оның бірнеше апта ішінде аяқталатынын айтты. Қорғаныс министрі Пит Хегсет керісінше, бұл тек бастамасы екенін мәлімдеді. Сонымен қатар кейбір деректер АҚШ-тың соғысқа қатысуы қыркүйекке дейін жалғасуы мүмкін екенін көрсетеді.
АҚШ пен Израильдің Иранға қарсы соғысы 28 ақпанда басталды. Осы уақытқа дейін 1200-ден астам адам қаза тапты. Араларында Иранның рухани көсемі Әли Хаменеи де бар. Сондай-ақ шабуылдарда 14 америкалық әскери қызметкер қаза тапты.
