Дональд Трамп дүйсенбі күні Ақ Үйде Беньямин Нетаньяхуды қабылдайды. АҚШ президенті АҚШ пен Израильдің қарсылығына қарамастан бірқатар батыс елінің Палестина мемлекетін мойындағаннан кейін келісімге келуін талап етуде.

Нетаньяху Ұлыбритания, Франция, Канада, Австралия және басқа да кейбір мемлекеттің Палестина мемлекетін мойындау шешімін «ұят» деп қатаң сынға алды. Бұл АҚШ-тың ең басты одақтастарының дипломатиялық ұстанымындағы елеулі өзгеріс ретінде бағалануда.

Бұл елдер Израиль–Палестина қақтығысында екі мемлекет негізіндегі шешім мүмкіндігін сақтау және Израильдің соғысын тоқтату үшін мұндай қадамның қажет екенін мәлімдеді.

Палестинаны мойындау әрекеттерін Хамасты марапаттау деп сынаған Трамп жексенбі күні “Reuters” агенттігіне берген сұхбатында Нетаньяхудың Палестина аймағындағы соғысты аяқтау үшін бір келісімге келуге үміт білдіретінін айтты.

Телефон әңгімесінде Нетаньяхудың лақап атын да қолданған Трамп: «Өте жақсы жауап алып жатырмыз, өйткені Биби де келісімге келуді қалайды. Барлығы келісімге келуді қалайды», – деді.

Трамп Сауд Арабиясы, Катар, БАӘ, Иордания және Мысыр басшыларына берген көмегі үшін алғысын білдіріп, келісімнің тек Газамен шектелмей, кең ауқымды Таяу Шығыс бейбітшілігін көздейтінін атап өтті: «Бұған Таяу Шығыстағы бейбітшілік делінеді, бұл тек Газа емес. Газа – оның бір бөлігі. Бұл – Таяу Шығыстағы бейбітшілік».

Газадағы бейбітшілік жөніндегі бір сұраққа жоғары лауазымды бір израильдік шенеунік: «Мұны айту үшін әлі ерте», – деп жауап берді. Ол Нетаньяхудың дүйсенбі күні Трамппен кездесуде ұсынысқа Израильдің жауабын беретінін қосты.