Израиль билігі Иранға қарсы соғысқа байланысты енгізілген қауіпсіздік шектеулерін сылтау етіп, басып алынған Шығыс Иерусалимде орналасқан Әл-Ақса мешітінде Ораза айт намазын оқуға тыйым салды.
Палестиналықтар Рамазан айының аяқталуына орай мұсылмандарды намаздарын Әл-Ақса мешітіне жақын жерде оқу үшін Ескі қала маңына жиналуға шақырды.
Израиль полициясы бұған дейін Әл-Ақсаға енгізілген шектеулерге наразылық білдіріп, Ескі қала қорғандарының сыртында намаз оқыған палестиналықтарға қарсы резеңке таяқ, дыбыс гранаталары және көзден жас ағызатын газ қолданған болатын.
Басып алынған Шығыс Иерусалим биыл айт мерекесіне көңілсіз кірді.
Ескі қала әдетте мереке қарсаңында палестиналықтарға толы болатын. Бұл жолы елес қалаға ұқсап қалған.
Израиль қоғамдық орындарда жиналуға тыйым салып, аймаққа кіруді шектеді. Палестиналық саудагерлердің дүкендерін ашуына кедергі келтіріліп, тек дәріханалар мен негізгі азық-түлік дүкендеріне ғана рұқсат берілді.
Израильдің қарымта әрекеттерінен қауіптенгендіктен аты-жөндерін жариялауды қаламаған палестиналық кәсіпкерлер бұл шектеулер ауыр экономикалық тығырыққа тірегенін айтты.
