АҚШ-та Harvard, Stanford және тағы мыңдаған оқу орны ауқымды кибершабуылға ұшырады.
2019 жылдан бері белсенді екені белгілі “ShinyHunters” кибершантаж тобының бейсенбі күнгі шабуылынан “Canvas” оқу платформасына кіру бұғатталды.
Топ 8 809 университет, мектеп және онлайн білім беру платформасынан 280 миллион студент пен қызметкердің жазбасын қолға түсіргенін хабарлап отыр.
“Harvard Crimson” студенттік газеті мен әлеуметтік желідегі жазбаға қарағанда, жүйеге кірмек болған студенттер хакерлік топтың “Canvas”-тың бас компаниясы “Instructure” серверлері «қайтадан» бұзылғаны туралы хабарламасын көрген.
Топ мектептер 12 мамырға дейін өздерімен байланыспаса, ұрланған барлық деректі жариялайтынын айтып қорқытты.
Хабарламада “ShinyHunters” тобы “Canvas” арқылы қолға түсіргенін мәлімдеген мектептер тізіміне сілтеме берілген.
Columbia University, Rutgers, Princeton, Kent State, Harvard және Georgetown сияқты АҚШ-тағы көптеген университет ел бойынша оқу орындарына әсер еткен кибершабуыл туралы студенттерге ескерту жариялады.
Оқиға АҚШ-тың Калифорния, Флорида, Джорджия, Оклахома, Орегон, Невада, Солтүстік Каролина, Теннесси, Юта және Вирджиния штаттарындағы мектеп аймақтарына да әсер етті.
Stanford университеті “Canvas” платформасының қазіргі уақытта қолжетімсіз екенін мәлімдеп, “Instructure” жақында ел көлемінде ақпараттық қауіпсіздік мәселесі болғанын және оның бақылауға алынғанын хабарлағанын қосты.
“Instructure” алғашқы мұндай оқиға кезінде ұрланған деректер арасында пайдаланушылар бөліскен жеке хабарламалар, сондай-ақ аты-жөні, электрондық пошта мекенжайлары және студенттік ID нөмірлері сияқты жеке мәліметтер болғанын мәлімдеді.
