Мәліметтерге сәйкес, саясаткерлер эмиссия ережелерін жеңілдетуді ұсынған кезеңнің өзінде Еуропа Одағында желтоқсан айында толықтай электрлі автокөліктердің сатылымы алғаш рет бензинді көліктердің сатылымынан басып озды.
Еуропалық автокөлік лоббиі “ACEA” сейсенбі күні жариялаған деректерге қарағанда, АҚШ-та орналасқан “Tesla” компаниясы қытайлық “BYD” және “Volkswagen” сияқты бәсекелестеріне нарықтағы үлесін беріп қойды.
Бүкіл Еуропа бойынша автокөлік сатылымы қатарынан алтыншы ай бойы жылдық негізде өсуін жалғастырды. Тіркеу мәліметтері бойынша, 2025 жылы Еуропада электрлі көліктерге тапсырыс беру соңғы бес жылдағы ең жоғары деңгейге жетті, алайда сатылым көлемі пандемияға дейінгі деңгейден әлі де едәуір төмен.
Еуропаның автокөлік секторы Қытайдан келген бәсекелестік, АҚШ-тың импорттық тарифтері және ішкі нарықта электрлі көліктерге көшуді тиімді жүзеге асыру сияқты қиындықтарға тап болды.
ЕО желтоқсан айында іштен жанатын қозғалтқышы бар көліктерге қатысты 2035 жылы күшіне енуі тиіс тыйымнан бас тартуды жоспарлап отырғанын хабарлады. Бұл қадам қиын жағдайда қалған автоөндірушілердің талаптарына көну ретінде бағаланды. Ал электрлі көлік топтары көмірқышқыл газының шығарындыларын шектеу үшін бұл процесті жеделдету керек деп есептейді.
Сарапшылар 2035 жылғы тыйымға қатысты саясаттың жұмсарғанына қарамастан, электрлі көліктердің танымалдығы арта береді деп болжайды.
Сату көрсеткіштері
“ACEA” мәліметтері бойынша, ЕО, Ұлыбритания және Еуропалық еркін сауда қауымдастығында сатылым желтоқсан айында 7,6 пайыз артып, 1,2 миллион көлікке жетті. Ал 2025 жылдың қорытындысы бойынша сатылым 2,4 пайыз өсіп, 13,3 миллион дананы құрады.
Сол айда “Volkswagen” және “Stellantis” өндірушілеріне сұраныс сәйкесінше 10,2 және 4,5 пайыз артса, “Renault-қа” сұраныс 2,2 пайызға төмендеді.
“Tesla-ға” сұраныс 20,2 пайыз азайса, “BYD-ге” сұраныс 229,7 пайызға күрт өскен.
ЕО-да автокөлік сатылымы желтоқсанда 5,8 пайыз артып, 1 миллионға жуықтады, ал жылдық есепте 1,8 пайыз өсіммен 10,8 миллионға жетті.
Желтоқсан айында батареялы электрлі көліктерге, қуатталатын гибридтерге және гибридті электрлі көліктерге тапсырыс сәйкесінше 51, 36,7 және 5,8 пайыз артты. Бұл көліктер жиынтық түрде ЕО блогындағы тапсырыстардың 67 пайызын құрады.
