Иран мемлекеттік медиасы аты-жөні жарияланбаған әскери шенеунікке сілтеме жасап, Ормуз бұғазы аймағында әрекет етіп жүрген АҚШ әскери-теңіз күштері Иранға тиесілі мұнай танкеріне шабуыл жасағаннан кейін Иранның зымыранмен соққы бергенін хабарлады.
Жұма күні таңертең жарияланған хабарда Иранның зымырандық шабуылдары салдарынан зақымданған АҚШ әскери кемелерінің шегінуге мәжбүр болғаны айтылды.
Оқиғаның нақты қашан болғаны хабарланған жоқ.
“Fox News” тілшісі “X” платформасындағы жазбасында жоғары лауазымды америкалық шенеунікке сілтеме жасап, АҚШ армиясының Кешм порты мен Бендер-Аббасқа шабуыл жасағанын мәлімдеді.
Пентагон бұл мәселеге қатысты түсініктеме берген жоқ. Алайда АҚШ әскері сәрсенбі күні Ирандағы портқа қарай бет алған Иран туы ілінген мұнай танкерін істен шығарғанын хабарлаған болатын.
АҚШ әскері “F-18” жойғыш ұшағы арқылы танкердің рөліне соққы жасалғанын мәлімдеді.
Бендер-Аббас пен Кешм аралы маңында жарылыстар
Сонымен қатар Иран БАҚ-тарының хабарлауынша, Бендер-Аббас пен Кешм аралы маңында жарылысқа ұқсас дыбыс естілген.
Жартылай ресми “Fars” ақпарат агенттігі жергілікті тұрғындардың Бендер-Аббас маңында жарылыс дыбысын естігенін хабарлап, Бахман айлағының кейбір бөліктері Иран күштері мен «жау күштері» арасындағы қақтығыс кезінде соққыға ұшыраған болуы мүмкін екенін қосты.
“Tasnim” агенттігі аймақтағы жарылыстарды растап, олардың Ормуз бұғазында әрекет ететін Иран Ислам революциясы сақшылары корпусының Әскери-теңіз күштерінің ескерту кемелерімен байланысты болуы мүмкін екенін алға тартты.
Иран мемлекеттік телерадиокорпорациясы “IRIB” Кешм аралындағы айлақтардың бірінде жарылыс болғанын және оқиғаның әлі де тергеліп жатқанын хабарлады.
Басқа ирандық ақпарат көздері де жарылыстар туралы хабарлағанымен, Израиль әскері “AFP” агенттігіне «мұндай шабуыл туралы хабардар емес екенін» мәлімдеді.
“Mizan” агенттігі Кешмде естілген жарылыс дыбыстары әуе қорғаныс жүйелерінің бірнеше шағын ұшқышсыз аппаратты жоюы салдарынан болғанын хабарлады.
“Tasnim” агенттігі болса, Бендер-Аббаста екі ұшқышсыз ұшу аппаратының әуе қорғаныс жүйелері арқылы атып түсірілгенін мәлімдеді.
