ХАМАС-тың жоғары лауазымды өкілі АҚШ президенті Дональд Трамп ұсынған Газаға қатысты бітім жоспарына жақын арада жауап беретіндерін мәлімдеді.
Мұхаммед Наззал Дохада «Әл-Жазира» телеарнасына берген сұхбатында: «ХАМАС көптеген ескертуге қарамастан бұл жоспарды байыппен талқылап жатыр», - деді.
Наззал қозғалыстың «қысым мен уақыт шектеуінсіз» жоспарды қарастырып жатқанын айтты. Сондай-ақ ол палестиналық топтардың тәуелсіз тұлғалар және араағайын елдермен кеңесіп жатқанын жеткізді. Ол ХАМАС-тың палестиналықтардың мүдделері мен Палестина ісінің стратегиялық ұстанымдарын ескеретінін атап өтті.
Трамптың жоспары
Ақ Үй 29 қыркүйек күні осы мәселеге байланысты егжей-тегжейлі жоспар ұсынған болатын. Бұл жоспарға сәйкес, Газа секторында атыс дереу тоқтатылып, қалпына келтіру жұмыстары жүргізіледі және аймақтың саяси әрі қауіпсіздік құрылымдары қайта ұйымдастырылады.
Жоспарға сай Газа қарусыз аймаққа айналып, Дональд Трамптың тікелей қадағалауындағы уақытша әкімшілік құрылым арқылы басқарылатын болады.
Сондай-ақ жоспар мақұлданғаннан кейін 72 сағат ішінде барлық израильдік және жүздеген палестиналық тұтқындар босатылмақ. Құжатта қақтығыстардың тоқтатылуы, палестиналық тойтарыс күштерінің қарусыздандырылуы және Израильдің Газадан кезең-кезеңімен әскерін шығаруы қарастырылған. Кейін бұл аймақ АҚШ президентінің жетекшілігімен халықаралық бақылау аясында технократиялық билік арқылы басқарылатын болады.
Трамп ХАМАС-қа жауап беру үшін «үш-төрт күн» уақыт берілетінін айтып, бұл жоспардың Газада шамамен екі жылға созылған соғысты тоқтата алатынын алға тартқан болатын.
Израильдің Газадағы қантөгісі
Израиль әскері 2023 жылдың қазан айынан бері Газаға қарсы геноцид жүргізіп келеді. Израильдің шабуылдары салдарынан 66 мыңнан астам палестиналық қаза тапты. Олардың басым бөлігі әйелдер мен балалар. Израиль халықаралық қауымдастықтың атысты тоқтату туралы талаптарын қабылдамауда.
Сондай-ақ қиратылған үйлердің астында шамамен 11 мың палестиналық қаза тапқан. Сарапшылар Газа билігі жариялаған ресми деректердің ақиқатқа жанаспайтынын, нақты қаза тапқандардың саны 200 мыңға жуық болуы мүмкін екенін алға тартты.
Халықаралық қылмыстық сот геноцид жасаушы Беньямин Нетаньяху мен бұрынғы Қорғаныс министрі Йоав Галлантқа Газадағы соғыс қылмыстары және адамзатқа қарсы қылмыстары үшін қамауға алу туралы ордер шығарды. Сонымен қатар Израильдің Газадағы соғысы Халықаралық сотта геноцид ісі ретінде қаралуда.
Біріккен Ұлттар Ұйымы «Израиль Газада геноцид жасап жатыр» деген қорытындыға келді. БҰҰ мен Адам құқықтарын қорғау ұйымдары аймақта өмір сүру мүмкін емес екенін, аштық пен аурудың таралуы гуманитарлық дағдарысты одан әрі ушықтырып отырғанын бірнеше рет ескертті.
Вашингтон өзінің одақтасы Израильге жыл сайын 3,8 миллиард доллар көлемінде әскери көмек беріп келеді. 2023 жылдың қазан айынан бері АҚШ Газадағы геноцид пен көрші елдерде жүргізілген соғыс қимылдарын қаржыландыру үшін Израильге 22 миллиард доллардан астам қосымша қолдау көрсетті.
Кейбір жоғары лауазымды америкалық шенеуніктер Израильді сынағанымен, Вашингтон қару-жарақ жеткізуді жалғастыруда. АҚШ-тың ықпалды сараптамалық орталығы Сыртқы қатынастар кеңесінің мәліметінше, АҚШ 1946 жылдан бері 310 миллиард доллардан астам әскери және экономикалық көмек көрсеткен.
