АҚШ сенаторы Линдси Грэм Қытай, Үндістан және Бразилияның Ресейден мұнай сатып алуды жалғастырып отырғаны үшін жақын арада белгілі бір жазаға тап болатынын айтты.

Жексенбі күні «Fox News» арнасына берген сұхбатында, Дональд Трамптың одақтасы саналатын Грэм былай деді: «Путин, сенің кезегің келді. Дональд Трамп — АҚШ-тың ішкі және сыртқы саясатындағы Скотти Шеффлер іспетті тұлға және сенің көзіңді жойғалы отыр».

Грэм Ресей мұнайының шамамен 80 пайызын сатып алып отырған үш ел Украинадағы соғысқа жанама түрде қолдау көрсетіп отырғаны үшін жақын арада жазаланатынын атап өтті. «Былай болады: Трамп Ресей мұнайын сатып алатын Қытай, Үндістан және Бразилияға кедендік салық енгізеді. Бұл үш ел арзан орыс мұнайының шамамен 80 пайызын сатып алып отыр. Бұл — Путиннің соғыс машинасын тірі ұстап тұрған басты фактор. Трамп бұл елдерге 100 пайыздық кедендік тариф салады және Путинге көмектескені үшін оларды жазалайды», — деді Грэм.

Грэм сондай-ақ бұл үш елдің алдағы уақытта экономикалық таңдау жасауға мәжбүр болатынын мәлімдеді. «Қытай, Үндістан және Бразилия — Америка экономикасы мен Путинге қолдау көрсету арасында таңдау жасауы керек болады. Және менің ойымша, олар Американы таңдайды», — деді ол.

Өткен аптада Ақ Үйде Трамппен кездескеннен кейін НАТО Бас хатшысы Марк Рютте де Бразилия, Қытай және Үндістан сияқты елдерге ескерту жасап, Ресеймен сауда қатынасын жалғастырған жағдайда АҚШ-тың екінші санкциясына ұшырауы мүмкін екенін айтқан болатын.

Рютте осы  елдердің басшыларына Путинге ықпал етіп, бейбіт келіссөздерге келуге мәжбүрлеу туралы үндеу тастаған еді. «Владимир Путинге хабарласыңыздар және оған бейбіт келіссөздерге байыппен қарау керектігін айтыңыздар. Әйтпесе бұл жағдай Бразилия, Үндістан мен Қытайға өте ауыр салдарын тигізеді», — деп мәлімдеді Рютте.