Үндістан, Польша және Венгрия 40 жылдан астам уақыттан кейін алғаш рет ғарышкерлерін ғарышқа жіберді. Олар Халықаралық ғарыш станциясына (ХҒС) жеке рейспен аттанды.

“SpaceX” компаниясының “Falcon” зымыраны NASA-ның Кеннеди ғарыш орталығынан ұшырылды. Бұл рейс ғарыш станциясындағы ақауға байланысты екі аптаға кешіктірілген болатын.

“SpaceX” мәліметінше, экипаж стансада 60-тан астам ғылыми эксперимент пен технологиялық демонстрацияларын жүзеге асырады. Олар адам зерттеулері, Жерді бақылау, биологиялық зерттеулер және материалтану салаларына бағытталған.

Үш ел екі апталық миссияның шығындарын бөлісті. Хьюстондағы “Axiom Space” компаниясы бұл миссияны ұйымдастырып, әрбір ғарышкердің билеті 65 миллион доллардан асатынын мәлімдеді.

NASA мәлімдемесіне сәйкес, экипаж бейсенбі күні ХҒС-қа жетеді деп жоспарланған.

Техникалық мәселелер мен қолайсыз ауа райы жағдайларына байланысты кешіктірілген бұл миссия Үндістан үшін маңызды оқиға болып табылады. Себебі топ капитаны Шубханшу Шукла ХҒС-қа баратын алғашқы үндістандық болмақ.

“Топ капитаны Шукла Халықаралық ғарыш станциясына барған алғашқы үндістандық болуға жақын,” – деп Үндістан премьер-министрі Нарендра Моди “X” әлеуметтік желісінде хабарлады.

Миссияны басқарушы – NASA-ның бұрынғы ғарышкері және “Axiom Space” компаниясының ғарыштық ұшу бағдарламасының директоры Пегги Уитсон. Миссияның екі маманы – Еуропалық ғарыш агенттігінің жобалық ғарышкері, польшалық Славош Узнаньски-Вишневски және венгриялық Тибор Капу.