Ресми тұлғалардың хабарлауынша, сенбі күні таңертең ерте басталған Ресей шабуылдарында Украина бойынша кем дегенде алты адам қаза тапты.
Харьков облысындағы көпқабатты тұрғын үйге жасалған соққыдан кейін үйінділер астынан бес адамның мәйіті табылды, сонымен қатар Днепр облысында бір адам көз жұмды.
Харьков мэрі Игорь Терехов бұған дейінгі мәлімдемесінде құтқарушылардың қаланың Киев ауданындағы тұрғын үй үйінділерінен үш адамның денесін тапқанын айтқан болатын. Облыстық әскери әкімшіліктің басшысы Олег Синегубов “Telegram-дағы” парақшасында шабуыл салдарынан он адамның, соның ішінде екі баланың (6 және 11 жастағы) және 17 жастағы бойжеткеннің жараланғанын хабарлады.
Синегубов бес қабатты ғимараттың шабуылдан кейін «іс жүзінде жойылғанын» айтып, құтқарушылар үйінді астында қалды деп қауіптенген тағы 10 адамды (ішінде бір бала бар) іздестіріп жатқанын жеткізді.
Польшаның әскери реакциясы
НАТО мүшесі Польша көршілес Украина аумағына жасалған шабуылдардың жиілеуіне байланысты әскери ұшақтарын әуеге көтергенін хабарлады.
Польша Қарулы Күштерінің Жедел қолбасшылығы Ресейдің Украинаға жасаған зымыран соққыларына орай елдің әуе кеңістігінде әскери ұшақтардың міндетке шыққанын мәлімдеді. Қолбасшылық “X” платформасында Ресей Федерациясының Украинаға бағытталған зымырандық шабуылдарына байланысты Польша әуе кеңістігінде әскери авиация бөлімшелері іске қосылғанын жариялады.
Украинаның барлық аумағында әуе шабуылы туралы дабыл қағылды. Харьков облысындағы Чугуев қаласының мэрі Галина Минаева «дұшпанның ұшқышсыз ұшақ шабуылы» салдарынан бір үйде екі адамның жараланғанын айтты.
