Жапония метеорология агенттігінің мәліметінше, Токиода 27 тамыздан бері күн сайын жауын-шашын тіркеліп келеді. “Kyodo News” хабарлауынша, тайфундар, күзгі жауын-шашын белдеуі мен төмен қысым аймағының әсерінен жаңбырлы ауа райы ұзаққа созылды.
Бұған дейінгі рекорд 2019 жылы 27 маусым мен 29 шілде аралығында тіркелген. Ол кезде жаңбыр 33 күн қатарынан жауған.
Қазіргі жауын-шашын кезеңіндегі ең жоғары көрсеткіш 21 қыркүйекте Токионың орталығында тіркеліп, 156 миллиметрге жетті. Дүйсенбіге дейін қала орталығына түскен жауын-шашынның жалпы мөлшері 629 миллиметр болды. Бұл қыркүйек айындағы орташа көрсеткіштен шамамен үш есе көп.
Жапонияның шығысы мен батысында жаңбыр жалғасуда
Сейсенбі күні Жапонияның шығыс және батыс аймақтарының басым бөлігінде жаңбыр жауды.
Синоптиктердің хабарлауынша, жауын-шашынды ауа райы әзірге сақталады. Жаңбыр әсіресе елдің шығысында бейсенбіге дейін жалғасуы мүмкін.
Жапониядағы күзгі жауын-шашын маусымдық ауа массаларының өзара әсерлесуінен қалыптасып, әдетте ұзаққа созылатын құбылмалы ауа райына әкеледі.
