Нетаньяху Иранның жаңа рухани көсеміне қоқан-лоқы көрсетті
Беньямин Нетаньяху Вашингтонмен бірлескен шабуылдарды қолдап, Хезболлаға қарсы соққылар жалғасатынын мәлімдеді.
Соғыс басталғалы бері өткізілген алғашқы баспасөз мәслихатында Нетаньяху Иранның жаңа рухани көсеміне жанама түрде қоқан-лоқы көрсетіп, Иранға қарсы жүргізіліп жатқан Израиль-АҚШ-тың бірлескен соғысын қорғады.
Бейсенбі күні сөйлеген сөзінде Нетаньяху шамамен екі аптаға созылған АҚШ-Израиль әуе соққыларынан кейін Иранның жағдайының бұрынғыдай емес екенін айтты. Оның айтуынша, Тегеранның Ислам революциясы сақшылар корпусы мен Басидж атты әскерилендірілген күштері елеулі соққыға ұшыраған.
Бейнебайланыс арқылы сұрақтарға жауап берген Нетаньяху Ливандағы Хезболланы нысанаға алуды жалғастыратынын айтты. Иран қолдайтын бұл топ Иранның рухани көсемінің өлтірілуіне жауап ретінде 2 наурызда оқ жаудырған болатын.
АҚШ президентімен тығыз байланыс
Нетаньяху Израильдің Иранның жаңа рухани көсемі Моджтаба Хаменеи мен Хезболла жетекшісі Наим Касымға қарсы қандай қадам басылатыны туралы сұраққа нақты жауап беруден бас тартты. Ол: «Террорлық ұйымның ешбір жетекшісіне сақтандыру кепілдігін бермес едім», - деп ескерту жасады.
«Біз жоспарымыз немесе қандай әрекет жасайтынымыз туралы нақты мәлімет беруді ойлап отырған жоқпыз», – деді Нетаньяху. Ол сондай-ақ Иран мен Хезболланың енді соғысқа дейінгі деңгейдегідей қауіп төндірмейтінін айтты.
Нетаньяху қақтығыс барысында АҚШ президенті Дональд Трамппен жиі байланыста болғанын да мәлімдеді. Оның айтуынша, олар күн сайын сөйлесіп, әңгімелері еркін әрі ашық форматта өткен.