АҚШ президенті Дональд Трамптың Израиль мен палестиналық ХАМАС ұйымы арасындағы бітім келісімінен кейін «алдағы күндері» Израильге барып, Кнессетте сөз сөйлеуі мүмкін екені хабарланды.
Трамп сәрсенбі күні “Axios” журналисі Барак Равидке берген сұхбатында: «Менен Кнессетте сөз сөйлеуімді сұрап отыр. Егер қаласа, мұны міндетті түрде жасаймын», – деді.
Трамп Нетаньяхуымен телефон арқылы сөйлескеннен кейін: «Бұл Израиль мен әлем үшін керемет күн. Бибимен әңгімем тамаша өтті. Ол өте қуанышты. Солай болуы да керек. Бұл – үлкен жетістік. Дұшпан елдерімен бірге бүкіл әлем осы келісімге қол жеткізу үшін бірікті», – деп қосты.
Трамп Иранның да ХАМАС пен Израиль арасындағы келісімнен кейін кеңірек бейбіт жоспардың бөлігі болатынына сенетінін айтты.
Трамп сәрсенбі күнгі мәлімдемесінде Израиль мен ХАМАС АҚШ ұсынған Газа келісімінің алғашқы кезеңін қабылдағанын хабарлады.
Барлық тарап «әділ түрде» қарастырылады
АҚШ президенті: «Барлық тұтқын жақын арада босатылады. Израиль де өз әскерін күшті, тұрақты және мәңгілік бейбітшілікке жасалған алғашқы қадам ретінде келісілген шепке қайтарады», – деп, барлық тарап «әділ түрде» қарастырылатынын атап өтті.
Трамп сондай-ақ сәрсенбі күні журналистерге осы аптада Мысырға баруы мүмкін екенін хабарлады.
Ақ Үй Трамптың жұма күні Мэриленд штаты, Бетезда қаласындағы Уолтер Рид әскери госпиталіне сапарынан кейін аймақтық сапарға шығуды ойлап отырғанын растады.
