АҚШ Иранмен жасалған бейбіт келісім аясында кемелердің Ормуз бұғазы арқылы тегін өтетінін жариялап, Тегеран экономикалық артықшылықтарға ие болмай тұрып өз міндеттемелерін орындауы қажет екенін тағы да мәлімдеді.
Жоғары лауазымды шенеунік журналистермен сөйлескен кезде Иран алатын артықшылықтардың қатарында соғыс салдарынан қираған инфрақұрылымды қалпына келтіруге арналған 300 миллиард долларлық қайта құру қоры бар екенін айтты. Алайда бұл қаражаттың бөлінуі «міндеттемелердің орындалуына байланысты» болатынын атап өтті.
Шенеуніктердің айтуынша, АҚШ президенті Дональд Трамп, вице-президент Джей Ди Вэнс және Иран Мәжілісінің төрағасы Мұхаммед Бакир Галибаф жексенбі күні өзара түсіністік туралы меморандумға электронды түрде қол қойған.
АҚШ шенеуніктерінің бірі аты-жөнін жарияламау шартымен:
«Президент Трамп өзінің бұл үдеріске адалдығын көрсету үшін құжатқа жеке өзі қол қоюды қалады», - деді.
Вэнс “CNN” арнасына берген сұхбатында: «Түсіністік туралы меморандум шамамен бір жарым беттен тұрады, сондықтан бұл өте жалпы сипаттағы құжат», - деді.
Вэнс осы аптада тараптар арасындағы келіссөздерге жетекшілік етеді және Швейцарияның Женева қаласында өтуі күтілетін ресми қол қою рәсіміне қатысады.
Ормуз бұғазы қалыпты режимге көшеді
Қол қою рәсімі Иран мен АҚШ толыққанды бейбіт келісім жасауға талпынатын 60 күндік кезеңнің басталуын білдіреді.
АҚШ өкілі кездесу барысында: «Біз ядролық келіссөздерді басты назарға шығарғымыз келеді», - деді.
Алайда Ормуз бұғазындағы жағдай мұнай бағасының өсуінен туындайтын жаһандық экономикалық салдарға байланысты шұғыл басымдық болып отыр.
Вэнс “CNBC” арнасына берген сұхбатында Иранмен бұғазды «ұзақ мерзімді перспективада ешқандай транзиттік төлемсіз» қайта ашу жөнінде өзара түсіністік бар екенін және бұл мәселенің техникалық келіссөздер барысында қарастырылатынын айтты.
Трамп стратегиялық маңызы зор бұғаздың жұма күнінен бастап «толықтай ашық» болатынын мәлімдеді, бірақ сонымен бірге миналарды тазарту жұмыстарының әлі де жалғасып жатқанын айтты.
АҚШ өкілінің айтуынша, кеме қатынасы «бірнеше апта ішінде» соғысқа дейінгі деңгейге қайта оралады, дегенмен «қазірдің өзінде қозғалыс көлемінің айтарлықтай артқаны» байқалып отыр.
Алайда Иран Сыртқы істер министрлігі дүйсенбі күні жасаған мәлімдемесінде келісім Иранға Ормуз бұғазы арқылы өтетін кемелерден «транзиттік төлем» емес, теңіз қызметтері үшін ақы алуға мүмкіндік беретінін хабарлады.
