АҚШ вице-президенті Джей Ди Вэнс дүйсенбі күні АҚШ-тың Ирандағы негізгі ядролық инфрақұрылымды нысанаға алған шабуылдарынан кейін Иранның бұдан былай ядролық қару жасау мүмкіндігі жоқ екенін айтты.

Вэнс «Fox News»-ке берген сұхбатында: «Біз қазір бір апта бұрынғы жағдайға қарағанда мүлде басқа жағдайда тұрмыз. Бір апта бұрын Иран ядролық қару жасауға өте жақын еді. Енді Иран қолда бар жабдықтармен ядролық қару жасай алмайды, өйткені біз оны жойдық»,- деді.

Вице-президенттің мәлімдемесі президент Дональд Трамп Израиль мен Иран арасындағы атысты тоқтату туралы келісімді мәлімдегеннен бірнеше сағаттан кейін жарияланды. Бұл мәлімдеме шамамен екі аптаға созылған тікелей қақтығыстардан кейін шиеленістің бәсеңдеуі ретінде қабылдануда.

«Ертең шын мәнінде жаңа күн, 12 күндік соғыстың аяқталуы. Иранның ядролық бағдарламасының аяқталуы және Таяу Шығыстағы бейбітшілік үшін өте маңызды істің бастауы деп ойлаймын», - деді Вэнс.

Иран мен АҚШ арасындағы шиеленіс демалыс күндері Америка күштерінің Израильдің Иранға қарсы әскери шабуылына қосылуымен ушыға түсті. АҚШ Ирандағы үш ядролық нысанға, оның ішінде Фордо жерасты байыту қондырғысына әуеден соққы берген болатын.

Бұған жауап ретінде Иран дүйсенбі күні АҚШ-тың Катардағы Әл-Удейд әуе базасына баллистикалық зымыран ұшырды. Зардап шеккендер туралы мәлімет жоқ. Ақ Үй соңғы әскери соққыны Иранның ядролық амбицияларына шешуші соққы және аймақтағы дипломатиялық күш-жігерге түрткі  болатын тірек ретінде сипаттады.

13 маусымнан бастап Израиль ядролық және әскери нысандар мен бейбіт тұрғындарды нысанаға алып, Иран аумағына шабуыл жасаған болатын. Тегеран Израильге қарымта шабуыл жасап, аймақтық соғыстың басталу қаупін тудырды.

Трамптың дүйсенбі күні жариялаған атысты тоқтату келісімі тараптардан әскери операцияларды біртіндеп тоқтатуын талап етеді. Алдымен Иран атысты тоқтатуды бастап, 12 сағаттан кейін Израиль де  атысты тоқтатады.  Атысты тоқтату басталғаннан кейін 24 сағат ішінде қақтығыс ресми түрде аяқталады деп күтілуде.

Ұзақ мерзімді әсерлері белгісіз болса да АҚШ шенеуніктері бұл сәтті маңызды бетбұрыс ретінде сипаттауда.