Израильдің “KAN” мемлекеттік телеарнасының хабарлауынша, Израиль сарбазының Ливанның оңтүстігіндегі христиан ауылы Дебелде Мәриям Ана мүсінінің аузына темекі қойған фотосуреті расталды.
Дебел ауылында түсірілгені анықталған суретте бір сарбаз мүсіннің аузына темекі қойып жатқан кезде жанындағы сарбаздардың бұл сәтті суретке түсіріп, әлеуметтік желіде жариялағаны айтылды.
Хабарда Израиль Бас штабының бастығы Эяль Замир сарбаздардың христиандардың діни рәміздеріне қатысты әрекеттерін «орынсыз мінез-құлық және армия құндылықтарынан ауытқу» деп атағаны хабарланды.
Сондай-ақ Израиль армиясының «оқиғаның тексеріліп жатқаны және анықталған жайттарға сәйкес қажетті шара қабылданатыны» жөнінде мәлімдеме жасағаны жеткізілді.
Иса пайғамбардың мүсініне жасалған шабуыл да наразылық тудырған еді
Израиль армиясының бір сарбазы 19 сәуірде Ливанның оңтүстігіндегі Израиль басып алған Дейр Серьян елді мекенінде Иса пайғамбардың мүсінін балғамен қиратқан болатын.
Израиль армиясы оқиғаға қатысты фотосуреттің шынайы екенін мойындап, тергеу басталғанын хабарлады.
Израиль сарбазының діни рәмізге жасаған әрекеті христиан әлемінің үлкен наразылығын тудырды.
Осыдан кейін Беньямин Нетаньяху оқиға үшін кешірім сұрап, мүсінді қиратқан және оны суретке түсірген екі сарбаздың әскери міндетінен шеттетілгенін әрі оларға 30 күндік әскери қамау жазасы берілгенін білдірген болатын.
Иса пайғамбарды бейнелейтін мүсінге жасалған шабуыл халықаралық наразылыққа ұласқаннан кейін Израиль Сыртқы істер министрі Гидеон Саар дипломат Джордж Дикті Христиан әлемі жөніндегі арнайы өкіл қызметіне тағайындаған еді.
