Ресей билігі сейсенбі күні түнде Мәскеу мен оның маңын нысанаға алған, 650 дрон қолданылған ауқымды шабуыл салдарынан бір адамның қаза тапқанын хабарлады.
Өңір губернаторы Андрей Воробьев Мәскеу маңындағы ауылдардың бірінде 20 жастағы ер адамның қаза тапқанын, сондай-ақ көптеген үйдің зақымданғанын мәлімдеді. Ал «РИА Новости» ақпарат агенттігінің хабарлауынша, алты адам жарақат алған.
«ТАСС» мемлекеттік ақпарат агенттігі бұл шабуылды соңғы екі жылда Мәскеу мен оның маңына жасалған дрон шабуылдарының ішінде ауқымы жағынан екінші ірі шабуыл деп сипаттады.
Соңғы айларда Ресей мен Украина бір-біріне қарсы ұзақ қашықтықтағы шабуылдарын күшейтті. Энергетика, көлік және порт нысандарын қоса алғанда, азаматтық және өнеркәсіптік инфрақұрылыммен қатар, Қара теңіздегі кемелер де шабуылдардың нысанасына айналып отыр.
Ресей қыс мезгілі жақындаған тұста Киевті қоса алғанда, инфрақұрылым нысандарына бағытталған шабуылдарды күшейтуді жоспарлап отырғанын мәлімдеді.
