БҰҰ-да Иран мәселесі бойынша тартыс күшейді
БҰҰ Қауіпсіздік Кеңесінде АҚШ Ресей мен Қытайды Тегеранды қорғауға тырысты деп айыптауда.
Осы айда төрағалық еткен АҚШ-тың қатысуымен өткен 15 мүшелі БҰҰ Қауіпсіздік Кеңесінің отырысында Ресей мен Қытай Иранға қарсы БҰҰ санкцияларының орындалуын бақылау және қадағалау үшін құрылған комитеттің талқылануына кедергі келтіруге тырысты.
Аталған бастама 11 дауысқа қарсы 2 дауыспен кері қайтарылды, 2 мүше қалыс қалды.
Кеңесте АҚШ-тың БҰҰ-дағы елшісі Майк Уолтц Ресей мен Қытайды 1737 комитеті деп аталатын құрылымның жұмысына кедергі жасап, Тегеранды қорғауға тырысты деп айыптады.
Уолтц: «БҰҰ-ға мүше барлық мемлекет Иранға қарсы қару-жарақ эмбаргосын енгізуге, зымыран технологиясын беруге және сауда жасауға тыйым салуға, сондай-ақ тиісті қаржылық активтерді бұғаттауға тиіс. Қайта енгізілетін БҰҰ ережелері ерікті емес. Керісінше, олардың ауқымы Иранның ядролық, зымырандық және дәстүрлі қару бағдарламалары мен Иран көрсетіп отырған терроризмді қолдаудан туындайтын қатерге жауап беретіндей етіп нақтыланған», - деді.
Сондай-ақ Уолтц Ресей мен Қытайдың жұмыс істеп тұрған санкциялық комитетке қарсы шыққанын айтып, «себебі олар серіктесі Иранды қорғап, енді қайтадан тыйым салынған қорғаныс саласындағы ынтымақтастықты жалғастырғысы келеді» деді.
Бұдан бөлек Уолтц БҰҰ-ның Халықаралық атом энергиясы агенттігі жуырда Иранның ядролық қаруы жоқ, бірақ 60 пайызға дейін байытылған уран өндіріп, жинақтап отырған жалғыз ел екенін тағы да растағанын және агенттікке бұл қорларға қол жеткізуге рұқсат беруден бас тартқанын айтты.
Қарсы айыптаулар
Ресейдің БҰҰ-дағы елшісі Василий Небензя бұл айыптауларды жоққа шығарып, АҚШ пен оның одақтастарын Иранның ядролық мақсаттарына қатысты дүрбелеңді әдейі күшейтіп отыр деп айыптады.
Ол: «Бұл Тегеранға қарсы тағы бір әскери авантюраға бару және Таяу Шығыс пен одан тыс аймақтардағы жағдайды ушықтыру үшін жасалды», - деді.
Қытайдың БҰҰ-дағы өкілі Фу Цун да Вашингтонды сынап, АҚШ-ты Иранның ядролық дағдарысының «арандатушысы» деп атады.
Иранның БҰҰ-дағы елшісі Әмір Саид Иравани болса журналистерге Тегеранның ядролық бағдарламасы «әрдайым тек бейбіт мақсатта» болғанын және Иран санкцияларды қайта енгізуге бағытталған қандай да бір әрекетті мойындамайтынын жеткізді.