Пари Сен-Жерменнің (“PSG”) шабуылшысы Усман Дембеле Чемпиондар лигасында көрсеткен жұлдызды ойыны үшін «Алтын допқа» (Ballon d'Or) ие болды. Ал испандық Айтана Бонмати әйелдер санатында бұл жүлдені үшінші рет жеңіп алды.
28 жастағы Дембеле Барселонаның жас жұлдызы Ламин Ямалды артта қалдырып, былтырғы иегер Манчестер Сити мен Испанияның ортаңғы шебіндегі ойыншысы Родриден кейін футболдағы ең беделді марапатты жеңіп алды. Бұл марапатты жылдар бойы Лионель Месси мен Криштиану Роналду алған еді.
Бұрынғы «Боруссия Дортмунд» пен «Барселона» шабуылшысы Дембеле 2018 жылғы Әлем чемпионатының жеңімпазы Франция құрамасының сапында ойнады. «PSG» командасымен бірге лига және кубок чемпиондығын жеңіп, барлық турнирде 35 гол соқты, Чемпиондар лигасында да жеңіске жетті.
Килиан Мбаппе «Реал Мадридке» ауысқаннан кейін Дембеле орталық шабуылшы позициясына өтті. Ол Мюнхендегі финалда “Интер”-ді 5:0 есебімен ұтып, «PSG» командасына алғашқы Еуропа кубогын сыйлады.
Париждің орталығындағы «Théâtre du Châtelet» сахнасында сөз сөйлеген Дембеле: «Сөзбен жеткізу қиын. «PSG» командасымен керемет маусым өткіздік», - деді. Сондай-ақ ол жылдың үздік клуб бапкері атанған Луис Энрикені «менің әкем сияқты» деп атап өтті. «Бұл жеке жүлде болғанымен, шын мәнінде бүкіл команданың ортақ жетістігі. Алтын доп мансабымдағы мақсат болмаған, бірақ Чемпиондар лигасын жеңу үшін командаға көмектесу басты тілегім еді», - деді Дембеле.
Қатарынан үш рет
«Барселона» мен “Испания” құрамасының жартылай қорғаушысы Айтана Бонмати Мариона Кальдентейді артта қалдырып, әйелдер санатында «Алтын доптың» иегері атанды. 27 жастағы Бонмати өткен маусымда командасымен Әйелдер Чемпиондар лигасының финалында «Арсеналға» есе жіберген еді.
Менингитпен ауырып, Испания құрамасының алғашқы екі матчында негізгі құрамға кірмегеніне қарамастан, Бонмати Еуропа чемпионатында турнирдің ең үздік ойыншысы деп танылды.
«Мақтанамын», - деді Бонмати. Жеке табысында команданың рөлін ерекше атап өтіп, «Қатарынан үшінші рет осы жерге келуімнің себебі - ойнаған командаларым. Мұның бәрі солардың арқасы», - деп қосты.
«Арсеналдың» ойыншысы Алессия Руссо үшінші орынға ие болды.
