«Cambridge» сөздігі 2025 жылдың сөзі ретінде «параәлеуметтік» терминін таңдады. Бұл термин адамдардың бейтаныс адамдарға сезінетін байланысын білдіреді.

Бұл таңдаудың өзі адамдардың танымал жұлдыздармен, инфлюенсерлермен және жасанды интеллект чатботтарымен орнататын біржақты қатынастар мен эмоциялық байланыстарға қызығушылықтың артқанын көрсетеді.

Терминді алғаш рет социолог Дональд Хортон мен Ричард Воль ұсынған. Олар теледидар көрермендерінің экрандағы адамдармен отбасы немесе достық қатынасқа ұқсас «параәлеуметтік» байланыс орнататынын байқаған болатын.

Сөздік атақты әнші Тейлор Свифт пен америкалық футболшы Трэвис Келсенің қарым-қатынасын мысалға келтіріп, көптеген жанкүйердің оларды мүлде танымаса да оларға ерекше жақындық сезінетінін атап өтті.

«Cambridge» сөздігі сейсенбі күнгі мәлімдемесінде, жасанды интеллект боттарымен қалыптасатын параәлеууметтік байланыстардың адамдардың «ChatGPT»-ге сырлас, дос, тіпті романтикалық серік секілді қарайтынын хабарлады.

Мәлімдемеде параәлеуметтік қатынастардың артуы жанкүйерлер мәдениетін, жұлдыз түсінігін және жасанды интеллект дәуірінде қарапайым адамдардың өзара онлайн әрекетін жаңаша қалыптастырып жатқаны атап өтілді.  

Мәлімдемеде «Әлемде миллиондаған адам параәлеуметтік қатынаста өмір сүріп жатыр. Сондай-ақ көптеген адам бұл құбылыстың қалай дамып жатқанын қызығушылықпен бақылауда. Деректер де мұны дәлелдейді. «Cambridge» сөздігінің сайтында «параәлеуметтік» сөзін іздеу айтарлықтай артқан», -делінген.