Иран Ұлттық қауіпсіздік кеңесінің хатшысы Али Лариджани дүйсенбі күні Тегеранның Вашингтонмен келіссөздерді қайта бастауға тырысып жатқаны туралы мәліметтердің шындыққа жанаспайтынын айтып, Иранның АҚШ-пен келіссөз жүргізбейтінін мәлімдеді.
Лариджани «X»платформасында Иранның АҚШ-пен келіссөз бастау үшін жаңа қадам басып жатқаны жөніндегі ақпаратқа жауап берді.
«Әл Жазира» телеарнасының «The Wall Street Journal» басылымына сілтеме жасап, «Лариджани Оман арқылы Вашингтонмен келіссөздерді қайта бастауға тырысты» деген ақпаратқа ол: «АҚШ-пен келіссөз жүргізбейміз», - деді.
Лариджани басқа жазбасында АҚШ президенті Дональд Трамптың Иран туралы айтқан сөздеріне жауап берді.
Ол Трампты «бос қиялмен аймақты хаосқа итермелеп отыр» деп айыптап, «Ол қазір америкалық сарбаздардың шығынға ұшырауына алаңдап отыр. Өз сандырағымен «Алдымен Америка» деген ұранды «Алдымен Израиль» деп өзгертіп, Израильдің билікқұмарлығы үшін америкалық әскерлерді құрбан етті».
Сонымен қатар Лариджани Трампты «Өтіріктерімен америкалық сарбаздар мен олардың отбасыларын ауыр зардап шегуге мәжбүрлеп отыр» деп айыптады.
Сенбі күні басталған АҚШ пен Израильдің бірлескен әскери операциясы барысында Иранның бірнеше жоғары лауазымды тұлғасы және рухани жетекшісі Әли Хаменеидің де қаза тапқаны хабарланды.
Тегеран бұған жауап ретінде Парсы шығанағы елдеріне ұшқышсыз әуе аппараттары және зымырандармен соққы жасады.
Шабуыл салдарынан үш америкалық әскери қызметкер қаза тауып, бес сарбаз ауыр жараланған.
