Казем Гарибабади “X” әлеуметтік желісіндегі парақшасында АҚШ Орталық қолбасшылығының (CENTCOM) Бахрейн астанасы Манамада өткізген әскери кездесуіне қатысты пікір білдірді.
Ол Бахрейнде өткен әскери жиын Парсы шығанағы үшін құқықтық және қауіпсіздік тәртібін қалыптастыра алмайтынын айтып,
«Аймақтың қауіпсіздігіне сыртқы араласудың тоқтатылуы, АҚШ-тың өңірден кетуі, мемлекеттердің егемендігіне құрмет көрсетілуі және жаңа геосаяси шындықтардың мойындалуы арқылы қол жеткізуге болады. Бұл Америка Құрама Штаттарының әскери қолшатырының аясында жүзеге аспайды»,- деді.
Гарибабади сондай-ақ Ормуз бұғазының мәртебесі мен тәртібі CENTCOM емес, Тегеран белгілейтін қағидалар негізінде айқындалуы тиіс екенін айтты.
Кеше CENTCOM Бахрейн Қорғаныс күштерінің ұйымдастыруымен Манама қаласында өңірлік қауіпсіздік мәселелеріне арналған әскери кездесу өткенін хабарлаған болатын.
Кездесуге Мысыр, Иордания, Кувейт, Ливан, Оман, Катар, Сауд Арабиясы, Сирия, Біріккен Араб Әмірліктері және Йеменнің жоғары лауазымды өкілдері қатысты.
Жиында өңірдегі қазіргі қауіпсіздік ахуалы, қорғаныс саласындағы ынтымақтастықты дамыту және Ормуз бұғазы арқылы сауда кемелерінің қауіпсіз өтуін қамтамасыз етуге бағытталған шаралар талқыланғаны айтылды.
