Судан Дәрігерлер комитеті жексенбі күні жасаған мәлімдемесінде елдің батысындағы Солтүстік Дарфур штатында қаңтар айынан бері кем дегенде 239 баланың азық-түлік пен дәрі-дәрмек тапшылығынан көз жұмғанын хабарлады.
Азаматтық денсаулық сақтау ұйымы қаңтар мен маусым аралығында Солтүстік Дарфурдың орталығы Әл-Фашер қаласында аштық пен күрделі азық-түлік пен медициналық материал жетіспеушілігі салдарынан бала өлімдерін тіркегенін мәлімдеді.
Комитет Жедел қолдау күштері (ЖҚК) тарапынан қоршауға алынған Әл-Фашердегі балаларға арналған азық-түлік қоймаларына шабуыл жалғасып жатқанын ескертіп, аштықтың күшейгеніне назар аударды.
«Желі бір жылдан астам уақыттан бері қоршауда өмір сүріп жатқан дарфурлық балалардың халықаралық қауымдастық тарапынан ескерусіз қалдырылғанына терең алаңдайды» делінген мәлімдемеде. Сондай-ақ Әл-Фашер мен Солтүстік Дарфур аймағындағы босқындар лагерлерінде азық-түлік пен дәрі-дәрмек мүлде жоққа тән екені, ал негізгі қажеттіліктердің бағасы тым шарықтап кеткені айтылған.
Әл-Фашерде қалып, үздіксіз қоршау мен бомбалауға тап болған бейбіт тұрғындарды құтқару үшін шұғыл түрде көмек көрсетуге үндеу жасалды.
Мәлімдемеде аймақтық және халықаралық ұйымдарға БҰҰ Бас хатшысы ұсынған бітімді қабылдап, оны жүзеге асыру үшін ЖҚК- ға қысым жасауға шақырылды.
«Гуманитарлық дәліздердің ашылуы, шұғыл көмек пен медициналық құрал-жабдықтардың жеткізілуіне мүмкіндік берілуі, сондай-ақ Әл-Фашер қаласын бір жылдық қоршаудың алынуы үшін дереу әрекетке көшу қажет», – делінді мәлімдемеде.
Дарфур аймағындағы бес штатқа гуманитарлық көмек көрсету орталығы болып саналатын Әл-Фашерде халықаралық ескертулерге қарамастан 10 мамырдан бері Судан армиясы мен ЖҚК арасында қақтығыстар жалғасуда.
Судан Егемендік кеңесінің төрағасы Абделфаттах әл-Бурхан жұма күні Әл-Фашерде жеті күндік гуманитарлық бітімді мақұлдады.
Кеңес мәлімдемесіне қарағанда, бұл шешім БҰҰ Бас хатшысы Антониу Гутерришпен жүргізілген телефон әңгімесінен кейін қабылданған.
Гутерриш көмекке зәру адамдарға гуманитарлық жәрдемнің жетуі үшін қоршаудағы Әл-Фашерде бір апталық бітім енгізуді талап еткен болатын.
Кеңес тарапынан жасалған мәлімдемеде бітімнің нақты қашан күшіне енетіні айтылмады.
Жедел қолдау күштері бұл мәселеге қатысты әзірге ешқандай пікір білдірмеді.
2023 жылдың сәуір айынан бері ЖҚК мен үкімет әскері арасындағы азаматтық соғыс мыңдаған адамның өмірін қиды және Суданды әлемдегі ең ауыр гуманитарлық дағдарыстардың біріне душар етті.
