Ресей Федерациясы Сыртқы істер министрінің орынбасары Сергей Рябков Сыртқы істер министрі Сергей Лавров пен АҚШ Мемлекеттік хатшысы Марко Рубионың БҰҰ Бас Ассамблеясы аясында кездесу өткізуі мүмкін екенін, алайда Киевтің Мәскеудің ұсынысына әлі жауап бермегенін айтты.

Ресей Сыртқы істер министрінің орынбасары Сергей Рябков Ресейдің АҚШ және Украинамен үшжақты саммиттің жүзеге асуын күтпейтінін, бірақ Мәскеу мен Вашингтонның биылғы жылдың ішінде екіжақты келіссөз өткізуі мүмкін екенін атап өтті.

Ресейдің ресми ақпарат агенттігі ТАСС-қа берген сұхбатында Рябков Сыртқы істер министрі Сергей Лавров пен АҚШ Мемлекеттік хатшысы Марко Рубионың Нью-Йоркте өтетін БҰҰ Бас Ассамблеясының 80-сессиясы барысында жүздесуі мүмкін екенін айтты.

Рябков: «Кездесуді ұйымдастыру процесі әлі талқылану үстінде. Мұндай кездесу өту ықтималдығы жоғары деп есептеймін», – деді.

Сондай-ақ ол Киевтің шілде айында Стамбулда өткен Ресей-Украина келіссөздерінің үшінші кезеңінде ұсынылған үшжақты форматқа әлі күнге дейін жауап бермегенін қосты.

Болашақта дипломатиялық дауларды шешуге бағытталған Ресей мен АҚШ арасындағы ықтимал консультациялар жайлы сөз қозғаған Рябков бұл процестің бірнеше мәрте кейінге қалдырылғанын, бірақ мұның тек логистикалық себептерге байланысты еместігін атап өтті.

Ресей Сыртқы істер министрі орынбасары: «Орнымызда тұрып қалмай, нақты ілгерілеуге қол жеткізгіміз келеді», – деп, Мәскеудің мұндай келіссөздерді «күздің соңына дейін» өткізуді үміт ететінін жеткізді.