Түркия Республикасының Көлік және инфрақұрылым министрі Абдулкадир Уралоғлу Иран маңында күтіп тұрған бір түрік кемесінің Тегераннан рұқсат алынғаннан кейін Ормуз бұғазынан өтуіне жол берілгенін айтты.
Министр Уралоғлу бейсенбі күні баспасөзге берген және жұма күні жарияланған мәлімдемесінде Анкараның Ормуз бұғазы үшін ең жоғары қауіпсіздік дабылын жариялағанын және аймақта қалған 14 түрік кемесінің жағдайына байланысты Иран билігімен байланыста екенін жеткізді.
Уралоғлу «Ормуз бұғазында 15 кемеміз болған еді, соның біреуін Иран портын қолданғаны үшін Иран билігінен рұқсат алып өткіздік. Иран тарапымен байланыс орнатуға тырысып жатырмыз. Қалған 14 кемеміз күтуде, қазіргі уақытта оларда ешқандай мәселе жоқ», — деді.
Министрлік бұғаздан өткен кеменің аты «Rozana» екенін жариялады. Мәлімдемеде аймақтағы түрік компанияларына тиесілі кемелерде жалпы саны 171 қызметкердің бар екені көрсетілген.
Америка Құрама Штаттары мен Израильдің Иранға қарсы жүргізіп жатқан соғысы Иранның Ормуз бұғазын іс жүзінде жауып тастауына байланысты танкерлер мен басқа да кемелердің қамалып қалуына және жаһандық энергиямен қамтамасыз ету мәселесінде алаңдаушылықтың артуына әкелді.
Сонымен қатар Көлік және инфрақұрылым министрлігі «Tүрік әуе жолдарыı» (THY) мен «Ajet» әуе компанияларының Ирак, Сирия, Ливан, Иордания, Доха, Дубай, Абу-Даби, Кувейт, Бахрейн және Даммамға рейстерін 19 наурызға дейін, ал Иранға рейстерін 20 наурызға дейін тоқтатқанын хабарлады.
«Pegasus» әуе компаниясының Кувейт, Бахрейн, Доха, Амман, Бейрут, Ирак, Дубай, Абу-Даби және Шарджаға рейстерін 23 наурызға дейін, Иранға рейстерін 28 наурызға дейін тоқтатқаны білдірілді.
Министрлік «Түрік әуе жолдары» компаниясының Оманға қосымша рейстер ұйымдастырып жатқанын және 28 ақпанда басталған соғыстан бері 76 рейстің Түркияға бағытталғанын мәлімдеді.
