Солтүстік Корея Израильдің Иранға жасаған әскери шабуылдарын "адамзатқа қарсы қылмыс" деп атап, бұл жағдай Таяу Шығыста ауқымды соғыс қаупін тудыруы мүмкін екенін ескертті.
Бейсенбі күні мемлекетік “KCNA” агенттігі таратқан мәлімдемеде Солтүстік Корея Сыртқы істер министрлігінің өкілі Пхеньянның Израильдің Ирандағы бейбіт тұрғындарға, ядролық және энергетикалық нысандарға жасаған әскери шабуылдарына "айрықша алаңдайтынын" айтып, бұл шабуылдарды "қатаң айыптайтынын" мәлімдеді.
Министрлік өкілі шабуыл барысында бейбіт тұрғындардың қаза табуын "адамзатқа қарсы кешірілмес қылмыс" деп атап, Тель-Авивті "мемлекеттік қолдауға ие терроризм" жүргізіп отыр деп айыптады. Сонымен қатар бұл әрекеттер аймақта "жаңа ауқымды соғыс" қаупін күшейтетінін жеткізді.
Солтүстік Корея АҚШ пен Еуропа елдерін бұл дағдарысқа араласпауға шақырды.
Министрлік өкілі: "Бүгінгі таңдағы күрделі ахуал АҚШ пен Батыс елдері тарапынан қолдау көріп отырған Израильдің Таяу Шығыстағы бейбітшілік үшін ісік тәрізді қауіп төндіретін құрылым екенін және жаһандық бейбітшілік пен қауіпсіздікті жоятын басты кінәлі екенін айқын дәлелдейді," – деді.
Ол сондай-ақ: "Халықаралық қауымдастық Иранның жәбірленуші ретінде заңды егемендік құқығы мен өзін-өзі қорғау құқығын қолдануын сынап, соғыс отын үрлей түскен АҚШ пен Батыс елдерінің әрекеттерін мұқият бақылап отыр," – деп қосты.
«Апат шегіне жету»
Солтүстік Кореяның бұл мәлімдемесі АҚШ Президенті Дональд Трамптың Иранға қатысты «шыдамымыз таусылды» деген сөзінен кейін жарияланды.
Солтүстік Корея Вашингтонды мұндай әрекеттерден бас тартуға шақырып, АҚШ пен оның одақтастарының әрекеттері «Таяу Шығыстағы жағдайды бақылауға келмейтін апат кезеңіне итермелеп жатыр» деп ескертті.
Трамптың бұл мәлімдемесі Иранның Жоғарғы рухани көшбасшысы Әли Хаменейдің Трамптың «шартсыз берілу» талаптарын қабылдамай, АҚШ-ты араласқан жағдайда «түзетуге келмейтін зиян» жайында ескертуінен кейін айтылды.
Осы арада “The Wall Street Journal” басылымы Трамптың сейсенбі күні кеңесшілеріне Иранға қарсы әскери шабуыл жоспарларын мақұлдағанын, алайда Иран ядролық бағдарламасынан бас тартып тартпайтынын күтіп отырғанын хабарлады.
