Түркияның Ұлттық қауіпсіздік кеңесі сәрсенбі күні жариялаған мәлімдемесінде Израильдің Газадағы атысты тоқтату режимін бұзатын шабуылдарын дереу тоқтатуы және өз міндеттемелерін орындауы қажет екенін айтты. Мәлімдемеде сондай-ақ Түркияның Газада бейбітшілік орнатуға және қаланы қалпына келтіруге жауапкершілік алуға дайын екені атап өтілді.
Анкарадағы Президенттік кешенде өткен отырысқа Түркия президенті Режеп Тайып Ердоған төрағалық етті.
10 қазанда күшіне енген атысты тоқтату келісімі бойынша Газаға тәулігіне 600 гуманитарлық жүк көлігі кіруі тиіс еді. Алайда Израиль күніне 200 көлікке ғана рұқсат беріп отыр.
Израиль келісім талаптарын орындамады және 10 қазаннан бері күн сайын жасаған шабуылы нәтижесінде кемінде 342 палестиналықтың қаза болуына себеп болды.
Израиль 2023 жылдың қазан айынан бері Газада 70 000-нан астам адамды өлтіріп, 170 700-ден астамын жаралады. Олардың көпшілігі ˗ әйелдер мен балалар.
Ұлттық қауіпсіздік кеңесі Анкараның Сирия халқының барлық топтарының бейбіт өмірі, әл-ауқаты және қауіпсіздігі үшін қолдау көрсетуін жалғастыратынын мәлімдеді.
Жиында Ресей-Украина соғысындағы соңғы жағдай да талқыланды. Кеңес әділ әрі тұрақты бейбітшілік орнату үшін Түркияның жаһандық әріптестерімен бірлесе атқарып жатқан күш-жігерін жалғастыру жөніндегі міндеттемесін растады.
