Түркия Сыртқы істер министрі Хакан Фидан жексенбі күні Біріккен Ұлттар Ұйымының Бас хатшысы Антониу Гутерришпен телефон арқылы сөйлесіп, өңірдегі соңғы жағдайды талқылады.
Түркияның дипломатиялық дереккөздерінің мәліметінше, Фидан мен Гутерриш БҰҰ Бас хатшысының Сирия мен Кипр аралына жасаған сапарлары аясындағы өңірлік мәселелерді қарастырды.
БҰҰ Бас хатшысы Антониу Гутерриш жексенбі күні Израильдің Сириядағы заң бұзушылықтарына қатысты егжей-тегжейлі есеп осы айдың соңына қарай Қауіпсіздік Кеңесіне ұсынылатынын мәлімдеді.
Дамаск қаласында өткен баспасөз мәслихатында сөз алған Гутерриш Сирияның егемендігі мен аумақтық тұтастығының бұзылуын қабылданбайтын әрекет деп атады. Ол Израильді 1974 жылғы Күштерді ажырату туралы келісімді сақтауға шақырып, «Сирияда болған ауыр оқиғалар халықтың өз заңды талаптарына қол жеткізуге деген шешімін өзгерте алмады», – деді.
Гутерриш сондай-ақ қазіргі уақытта БҰҰ-ның гуманитарлық көмегі Сирия халқының қажеттілігінің шамамен 20 пайызын ғана өтеп отырғанын айтты.
БҰҰ Бас хатшысы Антониу Гутерриш сенбі күні Дамаскіге барып, Сирия президенті Ахмед Шарамен және Сыртқы істер министрі Әсад аш-Шайбанимен кездесті. Кездесулер барысында ол БҰҰ-ның Сирияның егемендігіне, тәуелсіздігіне және аумақтық тұтастығына берік екенін мәлімдеп, халықаралық қауымдастықты елдің қалпына келуіне қолдау көрсетуге шақырды.
БҰҰ бейсенбі күні Бас хатшы Антониу Гутерриштің бейбітшілік үдерісін ілгерілету мақсатында Кипрге баратынын хабарлады.
БҰҰ өкілі Стефан Дюжаррик баспасөз мәслихатында: «Бас хатшы ізгі ниет миссиясы аясында және Кипр мәселесін шешуге деген берік ұстанымының белгісі ретінде 27–29 шілде аралығында Кипрге барады», – деді.
Дюжарриктің айтуынша, Гутерриш Солтүстік Кипр Түрік Республикасының президенті Туфан Эрхүрманмен және Оңтүстік Кипр грек әкімшілігінің басшысы Никос Христодулидиспен кездеседі. Сонымен қатар ол басқа да мүдделі тараптармен басқосып, БҰҰ-ның Кипрдегі бітімгерлік күштерінің қызметін қоса алғанда, бейбітшілік үдерісін ілгерілету және аралдағы тұрақтылықты қолдау бағытындағы жұмыстарды талқылайды.
