Бейсенбі күні бұқаралық ақпарат құралдарында жарияланған ақпаратқа сәйкес, Израиль Қаржы министрі Бецалель Смотрич басып алынған Шығыс Иерусалимде заңсыз қоныстанған еврейлер үшін 3 600 тұрғын үй салу жоспарын мақұлдады.
«Channel 7» телеарнасының мәліметінше, «Мишмар Йехуда» деп аталатын тұрғын үй қалашығы қаланың шығыс бөлігінде шамамен 835 гектар алаңға салынбақ.
Смотрич «X» әлеуметтік желісіндегі жазбасында бұл қоныстың Иерусалимді шығыстан қорғауға арналған стратегиялық аймақ ретінде қызмет ететінін және өңірдегі бақылауды күшейту саясатының бір бөлігі екенін айтты.
Халықаралық құқықты бұзғанына қарамастан Смотрич он мыңдаған тұрғын үй салынатынын және Иерусалимнің шығыс аймағын күшейтетінін алға тартты.
Оның айтуынша, бұл «тарихи» жоспар Израиль егемендігін арттыруға және басып алынған Батыс Шерияда Палестина мемлекетінің құрылуына жол бермеуге ықпал етеді.
Айта кетейік, Израиль үкіметі 12 желтоқсанда Батыс Шерияда 19 заңсыз қоныстың құрылысын мақұлдап, басып алуды одан әрі күшейткен.
Израильдің «Peace Now» құқық қорғау ұйымының дерегінше, қазіргі уақытта Батыс Шерияда шамамен 500 мың, ал басып алынған Шығыс Иерусалимде 250 мыңға жуық израильдік заңсыз тұрып жатыр.
Батыс Шерияны кеңейтіп, оны ресми түрде аннексиялау ˗ Біріккен Ұлттар Ұйымы қарарындағы Израиль мен Палестинадан тұратын екі мемлекетке негізделген шешімнің жүзеге асуына кедергі. Израиль 1948 жылы Палестинада құрылып, кейін Палестинаның басқа аумақтарын басып алды. Содан бері Израиль кері шегінуден бас тартып, астанасы Шығыс Иерусалим болатын тәуелсіз Палестина мемлекетінің құрылуына кедергі болып келеді.
