АҚШ Сенаты АҚШ Қорғаныс министрлігінің (Пентагон) 2026 жылы жүзеге асыратын саясаты мен шығыстарын айқындайтын 901 миллиард долларлық Ұлттық қорғанысқа өкілеттік беру туралы заңды мақұлдады.

Сенат заң жобасын сәрсенбі күні 77-ге қарсы 20 дауыс нәтижесімен қабылдап, осы айдың басында Өкілдер палатасынан өткен нұсқаны бекітті.
Енді құжат қол қою үшін АҚШ президенті Дональд Трамптың қарауына жолданады.

3 086 беттен тұратын заң жобасының негізгі тармақтарының қатарында Украина қауіпсіздігіне көмек көрсету бастамасы аясында Украинаға 800 миллион доллар бөлу (алдағы екі жыл үшін), сондай-ақ Башар Асад билігі кезінде енгізілген Цезарь санкцияларын алып тастау мәселесі бар.

Құжатта сондай-ақ «Темір күмбез» жүйесі секілді бірлескен зымыранға қарсы қорғаныс бастамаларын қоса алғанда, Израильге 600 миллион доллар қаражат бөлу көзделген.

Қытай тарапынан туындауы мүмкін қауіптерді де ескерген заң жобасы Үнді-Тынық мұхиты аймағындағы миссиялардың сәтті орындалуын қамтамасыз етуге бағытталған шараларды қамтиды. Сонымен қатар Тайвань қауіпсіздік ынтымақтастығы бастамасы үшін 1 миллиард доллар бөлінеді.

Ұлттық қорғанысқа өкілеттік беру туралы заң АҚШ Қорғаныс министрлігіне Шығыс Еуропадағы АҚШ-тың әскер шығындарын өтеу үшін НАТО одақтастарынан қаржы жинауға өкілеттік береді.

Сондай-ақ заң жобасы Пентагонға Еуропадағы әскери күшті 76 мыңнан азайтпас бұрын, мұндай қадамның АҚШ қауіпсіздігіне ықпалын алдын ала бағалауды міндеттейді.