АҚШ Ұлыбритания, Австралия, Канада, Жаңа Зеландия және Норвегияның екі израильдік министрге санкция салу шешімін «пайдасыз» деп сипаттады. Вашингтон Израильді халықаралық қауымдастықтан одан әрі оқшаулайтын кез келген әрекетке алаңдайтынын айтты.
Сейсенбі күні өткен баспасөз мәслихатында АҚШ Мемлекеттік департаментінің баспасөз хатшысы Тэмми Брюс "Біз мұны тиімсіз деп есептейміз. Бұл Газада атысты тоқтатуға апаратын жол емес. Одақтастардың санкциялары израильдік министрлерге бағытталған. Олар нағыз жауапты Хамасқа назар аударуы керек", - деді.
Брюс Ұлыбритания, Австралия, Канада, Жаңа Зеландия және Норвегияның Израиль Қаржы министрі Бецалель Смотрич пен Ұлттық қауіпсіздік министрі Итамар Бен-Гвирге саяхатқа тыйым салу және активтерін тоқтатуға байланысты мәлімдемесіне наразылық білдірді.
Бес елдің Сыртқы істер министрлері сейсенбі күнгі бірлескен мәлімдемеде «Бен-Гвир мен Смотрич зорлық-зомбылық жасады және палестиналықтардың адам құқықтарына елеулі түрде нұқсан келтірді», - деді. «Мұндай әрекеттерге жол берілмейді. Сондықтан біз қазір жауапқа тарту үшін шара қолдандық», - деп қосты.
Нетаньяхудың коалициялық үкіметінің басты тұлғалары Смотрич пен Бен-Гвир Газа секторындағы соғысқа қатысты қатал ұстанымдары және басып алынған Батыс Шериядағы заңсыз еврей қоныстары туралы мәлімдемелері үшін сынға ұшырады.
Батыс Шериядағы бір елді мекенде тұратын Смотрич заңсыз қоныстардың кеңеюін қолдайды және Палестина жерін аннексиялауға шақырады. Ол өткен ай Газаның толығымен жойылатынын және бейбіт тұрғындардың үшінші әлем елдеріне көптеп қоныс аударатынын айтты.
Бен-Гвир Газадағы палестиналықтарды қоршаудағы аймақтан эвакуациялауға шақырған болатын.
Газаға гуманитарлық көмек көрсету қоры
Брюс одақтастарды Израиль басып алған аумақтарда АҚШ бастаған Газа гуманитарлық көмек қоры арқылы көмек таратуды қолдауға шақырды.
«Егер біздің одақтастарымыз көмектескісі келсе, олар арнайы елші (Стив) Уиткоффтың келіссөздерін қолдауға және Газа гуманитарлық қорына азық-түлік пен көмек көрсетуге назар аударуы керек», - деді Брюс.
Көмек бағдарламасы басталғаннан бері Израиль күштері көмек орталықтарынан азық-түлік алуға келген 130-дан астам палестиналықты өлтірді. 1000-ға жуық адам жараланды, кемінде тоғыз адам із-түзсіз жоғалып кетті.
АҚШ-тың Израильдегі елшісі Майк Хакабидің АҚШ бұдан былай тәуелсіз Палестина мемлекетін құруды көздемейтіні туралы мәлімдемелеріне қатысты Брюс: «Мен елші Хаккабидің жасаған немесе жасамаған мәлімдемесі туралы пікірталас туындатқым келмейді», - деді.
«Bloomberg News»-ке берген сұқбатында Хакаби «Палестина мемлекеттілігі АҚШ саясатының мақсаты ма?» деген сұраққа «Мен олай ойламаймын» деді. Арканзас штатының бұрынғы губернаторы және Израильді қолдайтын консерватор Хакабиді президент Дональд Трамп Израильге елші етіп тағайындаған болатын.
