Индонезияның Сыртқы істер министрі сейсенбі күні ирандық әріптесіне Джакартаның Иран, АҚШ және Израиль арасындағы ушығып бара жатқан қақтығыста бітім орнату үшін көмек беруге дайын екенін жеткізді.
Индонезия Сыртқы істер министрі Сугионо Таяу Шығыстағы шиеленістің артуы аясында Иран Сыртқы істер министрі Аббас Аракчимен телефон арқылы сөйлесті.
Сугионо “X” платформасындағы жазбасында: «Индонезия бейбітшілікті ілгерілетуде сындарлы рөл атқаруға дайын. Осы тұрғыда шиеленістің одан әрі ушығуына жол бермеу және жазықсыз адамдардың қаза табуын болдырмау мақсатымен диалог пен бітімгерлікті жеңілдетуге әзір екенімізді мәлімдейміз», - деді.
Министр барлық тарапты барынша сабыр сақтауға және шиеленісті төмендету үшін шұғыл шара қабылдауға шақырды.
Дүйсенбі күні Аракчи өңірлік ахуалды талқылау үшін Ауғанстанның уақытша Сыртқы істер министрі Молла Әмір Хан Муттакимен де сөйлесті.
Ауғанстан Сыртқы істер министрлігінің мәлімдемесіне сәйкес, Муттаки жағдайға «терең алаңдаушылық» білдіріп, Иранға қарсы АҚШ пен Израильдің шабуылдарын айыптады.
Сондай-ақ Муттаки Иранның Жоғарғы жетекшісі Әли Хаменейдің нысанаға алынуына байланысты көңіл айтты.
Сенбі күнінен бері АҚШ пен Израильдің бірлескен шабуылдары салдарынан Иранның бірқатар жоғары лауазымды тұлғаның қаза тапқаны хабарланды.
Тегеран Парсы шығанағындағы АҚШ-пен байланысты нысандарға ұшқышсыз ұшу аппараттары мен зымыран арқылы соққы беріп, жауап қайтарды.
Иран Қызыл Жарты Ай қоғамының мәліметінше, сенбі күнінен бері АҚШ пен Израильдің әуе шабуылдары салдарынан қаза тапқан саны 555-ке жетті.
