Түркия президенті Режеп Тайып Ердоған Катарға барып, өткен аптада Израильдің Дохаға жасаған шабуылынан кейін ұйымдастырылатын төтенше Араб-Ислам саммитіне қатысады.
Президент Ердоғанмен бірге жұбайы Емине Ердоған, Ұлттық барлау ұйымының басшысы Ибрахим Калын, Президенттің сыртқы саясат және қауіпсіздік жөніндегі бас кеңесшісі Акиф Чағатай Кылыч, Коммуникация басқармасы басшысы Бурханеттин Дуран және Әділет және даму партиясының төраға орынбасары Халит Йеребакан сапарға шықты.
Дохадағы Араб-Ислам саммиті аймақтың әртүрлі елдерінен мемлекет басшылары мен жоғары лауазымды тұлғаларды жинайды.
Саммит өткен аптада ХАМАС жетекшілерін нысанаға алған және Хамастың бес мүшесі мен катарлық бір қауіпсіздік қызметкері қаза тапқан Израиль шабуылына жауап ретінде өткізіледі.
«Халықаралық қауымдастық қос стандартты тоқтатып, Израильді жасаған барлық қылмыстары үшін жазалауы керек», – деді Катардың премьер-министрі және Сыртқы істер министрі Шейх Мұхаммед бин Абдуррахман Әл Тани.
Ол «Бұл режим Катар, Ливан, Ирак, Иран және Йемен сияқты көптеген ислам еліне шабуыл жасады. Олар қалағанын істейді, ал өкінішке қарай АҚШ пен Еуропа елдері бұл әрекеттерді қолдайды» деді.
Катар АҚШ және Мысырмен бірге 2023 жылдың қазан айынан бері 65 000-ға жуық палестиналық қаза тапқан Газаға қарсы Израиль соғысын тоқтату бойынша келіссөздерде делдалдық жасап келеді.
