Түркияның Сыртқы істер министрі Хакан Фидан Исламабадқа ресми сапары барысында түрік компанияларының Пәкістан жағалауында мұнай және табиғи газ барлау жұмыстарын жүргізетінін мәлімдеді.
Сәрсенбі күні Пәкістан премьер-министрінің орынбасары және Сыртқы істер министрі Мұхаммад Исхак Дармен ортақ баспасөз мәслихатында сөз сөйлеген Фидан Анкараның Исламабадпен стратегиялық салаларда экономикалық және энергетикалық қарым-қатынастарын тереңдету мәселесіне тоқталды. Ол Түркия мен Пәкістанның екіжақты сауда көлемін 5 миллиард долларға жеткізу үшін жұмыс істеп жатқанын айтып, «Тау-кен, табиғи газ, мұнай және сирек кездесетін минералдар саласында ынтымақтастық механизмдерін бағалаудамыз»,- деді.
Фидан сәуір айында Түрік мұнай корпорациясы (TPAO) мен Пәкістанның ұлттық мұнай компаниялары арасында қол қойылған энергетикалық келісімді екіжақты ынтымақтастықты кеңейту жолындағы өте маңызды қадам деп сипаттады.
Бұл келісім түрік және пәкістандық компанияларға Пәкістанның теңіз аймағында мұнай және газ барлау жұмыстарын ортақ жүргізуге мүмкіндік береді. Бұл - Түркия-Пәкістан энергетикалық ынтымақтастығы тарихында бұрын-соңды болмаған қадам.
Фидан: «Бұл - біз алға қойған құрылымдық жұмыстың нәтижелерінен бірі», - деді.
Әріптестікті тереңдету
Исхак Дар Исламабад пен Анкараның экономика, қорғаныс өнеркәсібі, энергетика және инфрақұрылым сияқты әртүрлі салада ынтымақтастықты одан әрі арттыру туралы келісімге келгенін айтты.
Дар Түрік қорғаныс өнеркәсібін мақтап, Исламабадтың қазіргі стратегиялық және қорғаныс өнеркәсібі ынтымақтастығын одан әрі күшейтіп, аймақтағы бейбітшілік пен тұрақтылықты ілгерілетуді қалайтынын мәлімдеді.
Дар екі тарап терроризммен күресте әлеуетті арттыру сияқты әртүрлі іс-шараларға белсенді қатысқанын айтып, түрік компанияларының да энергетика секторындағы жеткізу компанияларының жекешелендіруіне қатысатынын атап өтті.
Арнайы экономикалық аймақ
Екі ел Карачи мен Стамбулда түрік кәсіпкерлері үшін арнайы экономикалық аймақ құруды көздейтінін атап өткен Дар: «Кемені бөлшектеу және сақтау, ауылшаруашылық суын тиімді пайдалану сияқты салаларда Түркияның тәжірибесін белсенді түрде пайдалануды жалғастырудамыз»,- деді.
Дар Исламабад пен Анкараның 11 жылдық үзілістен кейін бірлескен министрлер комиссиясын қайта жандандыруға келіскенін және бұл комиссияға Пәкістан Сауда министрі Джем Кемал мен Түркия Қорғаныс министрі Яшар Гүлер төрағалық ететінін хабарлады.
Дар: «Бұл жұмыстың барлығы келер жылы Түркияда өтетін Жоғары деңгейдегі стратегиялық ынтымақтастықтың сегізінші кеңесі үшін берік іргетас қалайды», - деді.
