Иран бейсенбі күні жасаған мәлімдемесінде Ормуз бұғазының жаһандық теңіз қатынасына ашық болатынын, алайда қарсыластары мен олардың аймақтағы базалары үшін жабық екенін атап өтті.
Иранның рухани көсемі Моджтаба Хаменейдің кеңесшісі Әли Әкбар Велаяти «X» әлеуметтік желісінде жариялаған жазбасында соғыстың нәтижесі қарсы тараптардың жаңсақ түсінігімен емес, Иранның стратегиясымен айқындалатынын айтты.
Әли Әкбар Велаяти: «Ормуз бұғазы әлем елдеріне ашық, бірақ Иран халқының жаулары мен олардың аймақтағы базалары үшін жабық болады», – деді.
Сондай-ақ ол соғыстың Иранның шарттарына сай аяқталатынын айтып, «Соғыс шабуылдаушылардың иллюзиясымен емес, Иранның стратегиясы мен билігі арқылы аяқталады», – деді.
Бұл мәлімдемелер АҚШ президенті Дональд Трамп Иранның өте аз зымыран ұшыру қондырғылары қалғанын және зымыран мен ұшқышсыз ұшу аппараттарын ұшыру мүмкіндігі айтарлықтай шектелгенін мәлімдегеннен бірнеше сағат өткен соң жасалды.
Трамп соғыстың тағы екі-үш аптаға созылуы мүмкін екенін болжап, алайда қақтығыстың аяқталуға жақын екенін жеткізді.
Тегеран Азия елдеріне энергия жеткізу үшін маңызды су жолы саналатын Ормуз бұғазын бақылауда ұстап отыр. Бұғаз Иран «дос елдер» деп атаған мемлекеттердің кемелеріне ашық.
Аймақтағы шиеленіс Израиль мен АҚШ 28 ақпанда Иранға қарсы бірлескен шабуыл бастағаннан кейін күшейді.
