Фидан өңірді бұрын-соңды болмаған дағдарысқа итермелеп отырған тараптың Израиль екенін айтып, қақтығысты өз қылмыстары мен басып алу саясатын бүркемелеу үшін пайдалануына жол бермеу керектігін ескертті.
Бұл мәлімдемені ол бейсенбі күні Дохада Мұхаммед бин Абдуррахман Әл Санимен өткен кездесуден кейін бірлескен баспасөз мәслихатында жасады. Кездесу өңірдегі шиеленісті бәсеңдетуге бағытталған дипломатиялық ресми сапар аясында өтті.
Фидан дипломатиялық келіссөздер кезінде басталған АҚШ-Израиль шабуылдарының ауқымы кеңейгенін айтып, бұл жағдай өңірді ірі қақтығыс алаңына айналдырып, жаһандық тұрақтылыққа нұқсан келтіргенін жеткізді.
«Біз бейбіт тұрғындардың өмірін елемей, азаматтық инфрақұрылымды нысанаға алған шабуылдарды қатаң айыптаймыз және қабылдамаймыз. Мұндай әрекеттер ақталмайды. Түркия бауырлас Катардың әрдайым жанында , – деді ол.
Сонымен қатар Фидан Иранға ескерту жасап, өңір елдеріне бағытталған шабуылдардың қабылданбайтынын атап өтті.
«Қандай себеп болса да, Иранның өңір елдеріне қарсы әрекеттері өңірлік тұрақтылықтың негіздерін әлсіретеді. Бұл әрекеттер қабылданбайды және Иранға да, өңірге де пайда әкелмейді», – деді.
«Иранға қарсы шабуылдар қаншалықты қате болса, Иранның да себепсіз өңір елдеріне шабуыл жасауы қате», – деп қосты ол.
Фидан сондай-ақ Тегеранды жауапкершілікпен әрекет етуге шақырып, шиеленістің дереу тоқтатылуы қажет екенін айтты.
Ол теңіз қауіпсіздігі туралы ескертіп, мұның жаһандық сауда мен энергия тасымалы үшін үлкен тәуекелдерге әкелуі мүмкін екенін атап өтті.
Дипломатия – түпкілікті шешім болуы тиіс
Катар премьер-министрі әрі Сыртқы істер министрі Мұхаммед бин Абдуррахман Әл Сани де тараптарды сабырға шақырып, соғысты дереу тоқтату қажеттігін мәлімдеді.
«Соғыс дереу тоқтатылуы тиіс. Бұл соғыстан кімнің пайда көріп отырғаны және өңірді қақтығысқа кім итермелегені баршаға анық», – деді ол.
Әл Сани қақтығыстың ауқымын кеңейту өңірлік қауіпсіздік пен тұрақтылыққа зиян келтіретінін атап өтіп, «Қақтығысты ұлғайту өңірдің қауіпсіздігі мен тұрақтылығына пайда әкелмейді», – деді.
Ол сондай-ақ дипломатия алғашқы әрі түпкілікті шешім болып қалуы тиіс екенін айтты.
Иранның АҚШ базаларын нысанаға алғаны туралы мәлімдемелерін «қабылданбайтын жағдай әрі негізсіз» деп бағалаған Әл Сани Рас-Лаффанға жасалған шабуылдың жаһандық энергия жеткізіліміне әсер етуі мүмкін екенін ескертті.
Түркияға үздіксіз қолдауы үшін алғыс білдірген ол Анкараның Дохаға қолдауы әрдайым жалғасып келе жатқанын айтты.
Сыртқы істер министрі Хакан Фидан Таяу Шығыста жалғасып жатқан соғысты талқылау мақсатында өңір елдеріне ресми сапармен барды.
Бұл сапар АҚШ пен Израильдің 28 ақпанда Иранға қарсы бірлескен операция бастауы және кейін Тегеранның өңірдегі бірқатар елге бағытталған шабуылдары салдарынан тұрақсыздық күрт күшейген кезеңде жүзеге асырылуда.
