Пентагон сәрсенбі күні Иранға қарсы соғыс кезінде қаза тапқан АҚШ-тың тағы екі әскери қызметкерінің ат-жөнін жариялады.
АҚШ армиясының резервтік күштеріндегі екі сарбаз жексенбі күні Кувейттің Шуаиба портындағы АҚШ әскери нысанына жасалған ұшқышсыз әуе аппараты шабуылы кезінде қаза тапқан. Сол шабуылда тағы төрт әскери қызметкер де көз жұмған.
АҚШ Қорғаныс министрлігі сенбі күні Иранға тиесілі ұшқышсыз әуе аппаратының Шуаиба портына жасаған шабуылынан қаза тапқан алты америкалық әскери қызметкердің екеуі Айова штатының Индианола қаласынан 45 жастағы Джеффри Р. О’Брайен және Калифорния штатының Сакраменто қаласынан 54 жастағы Роберт М. Марзан екенін хабарлады.
Пентагон Марзанның шабуыл болған жерде қаза тапқанын және оның нақты тұлғасы сот-медициналық сараптамадан кейін анықталатынын мәлімдеді.
Пентагон бұған дейін қаза тапқан тағы төрт әскери қызметкердің есімдерін жариялаған болатын. Олар Флорида штатының Уинтер-Хейвен қаласынан 35 жастағы Коди А. Хорк, Небраска штатының Белвью қаласынан 42 жастағы Ноа Л. Титженс, Миннесота штатының Уайт-Беар-Лейк қаласынан 39 жастағы Николь М. Амор және Айова штатының Уэст-Де-Мойн қаласынан 20 жастағы Деклан Дж. Коуди.
Кувейттегі Шуаиба порты ˗ коммерциялық порт болғанымен, АҚШ әскері үшін тактикалық техникалар мен әскери жабдықтарды тасымалдауда маңызды логистикалық орталық.
Шабуыл салдарынан 18 сарбаз жарақат алды.
Бұл шабуыл сенбі күні АҚШ пен Израильдің Иранға жасаған бірлескен соққыларынан кейін болды. Сол шабуыл барысында Иранның рухани жетекшісі Әли Хаменеи бастаған бірқатар жоғары лауазымды ирандық шенеуніктер қаза тапқан.
Содан бері Иран Парсы шығанағы елдері мен аймақтағы АҚШ-тың әскери нысандарына шабуылдауда.
