Түркия Республикасы Сыртқы істер министрлігінің дереккөздерінен алынған мәліметке сәйкес, бесінші Анталия дипломатиялық форумы (“ADF2026”) 2026 жылы 17–19 сәуір күндері Түркия президентінің жетекшілігі және Түркия Сыртқы істер министрлігінің ұйымдастыруымен Анталия қаласында «Ертеңді жобалау, белгісіздіктерді басқару / Mapping Tomorrow, Managing Uncertainties» негізгі тақырыбымен өтеді.
Алғаш рет 2021 жылы ұйымдастырылған бұл форум өзекті халықаралық мәселелердің талқылануына үлес қосып келеді.
Сыртқы істер министрлігінен алынған мәліметке сәйкес, форумға 150-ден астам елден 20-дан астам мемлекет және үкімет басшысы, шамамен 15 мемлекет және үкімет басшыларының орынбасары, 50-ден астам министр, халықаралық ұйымдардың 75 өкілін қоса алғанда 460-тан астам жоғары лауазымды тұлға, ғалымдар мен студенттерді қоса алғанда 5 мыңға жуық қонақтың келуі күтілуде.
“ADF2026” аясында 40-тан астам іс-шара мен отырыс өткізу жоспарланып отырғаны хабарланды.
Алынған мәліметке сәйкес, отырыстарда жаһандық жүйедегі тереңдеп келе жатқан белгісіздіктер мен трансформация үдерістері, сондай-ақ өңірлік даму кең ауқымда қарастырылады. Сонымен қатар саяси, экономикалық, экологиялық және технологиялық бағыттарда қалыптасып отырған негізгі күн тәртібіндегі мәселелер қарастырылатыны атап өтілді.
Сондай-ақ форум аясында Сыртқы істер министрі Хакан Фиданның төрағалығымен Балқан бейбітшілік платформасының үшінші сыртқы істер министрлері отырысын, Газа мәселесіне арналған сегізжақты кездесуді, Түркі Мемлекеттері Ұйымы Сыртқы істер министрлері кеңесінің бейресми отырысын және Түркия–Пәкістан–Сауд Арабиясы–Мысыр кездесуін өткізу жоспарланып отырғаны айтылды.
“ADF2026” аясындағы іс-шараларды форумның ресми интернет сайты мен әлеуметтік желідегі парақшаларынан тікелей бақылауға болатыны, ал отырыстардың басым бөлігі “TRT” арналарында тікелей эфирде көрсетілетіні хабарланды.
